ملي امنیت: په میدان وردګ کې پروني برید ۳۶ تنه وژلي او ۵۸ ټپیان دي
د ملي امنیت عمومي ریاست نن دا خبره په یوه اعلاميه کې کړې ده.
مخکې د ملي امنیت د ریاست یوې سرچینې نن ازادي راډیو ته تأیید کړې وه چې ميدان ښار ته نږدې په پروني برید کې ۴۳ تنه وژل شوي او ۵۴ نور ټپیان شوي دي.
نن د ولسمشر دوهم مرستيال سرور دانش په کابل کې د يوې غونډې پر مهال وويل چې د هېواد دښمنان بايد په دې پوه وي چې دا پېښه به بېځوابه پاتې نهشي.
په کابل کې د امریکا سفارت په ميدان وردګ کې د ملي امنیت پر يوه روزنيز مرکز حمله په سختو ټکو غندلې ده.
په يوه اعلاميه کې دې سفارت ويلي چې دا حمله د افغانستان د دفاع کوونکو پر وړاندې یوه ډارنه هڅه ده چې پر ضد يې امریکا د افغانانو تر څنګ ولاړه ده.
د ملي امنيت ریاست په نننۍ اعلاميه کې ویل شوي چې طالبانو دا حمله د هاموې موټر په واسطه کړې.
اعلاميه زیاتوي، همداراز درې ځانمرګي بریدګر چې غوښتل يې دغه روزنيز مرکز ته ننوځي، د مرکز ساتونکو ووژل.