چارواکي: د کونړ په ماڼوګي کې د طالبانو او داعش ترمنځ جګړه روانه ده
دولتي چارواکي جګړه تأییدوي، خو دواړو خواو ته د اوښتو تلفاتو په اړه بې خبري ښيي.
په ختیځ کې د ۲۰۱ سیلاب قول اردو ویاند محمد هارون یوسفزي ازادي راډیو ته وویل، دوی ته د یوه طالب وسله وال د ټپي کېدو خبر رسېدلی، خو دی زیاتوي چې جګړه د ماڼوګي په اړوندو درو کې په داسې یوه سیمه کې روانه ده چې نه خلک هلته تګ راتګ کولای شي او نه ټيليفون کار کوي.
د کونړ چارواکي وايي، دا په کونړ کې د وسله والو طالبانو او داعش ډلې ترمنځ لومړۍ جګړه نه ده او له دې مخکې هم په چپې درې ولسوالۍ او نورو سیمو کې د دوی ترمنځ جګړې شوي دي.