مسؤلین: په بلخ کې د ټاکنو لپاره د نوم ثبتونې ۱۳ مرکزونه بند دي
په بلخ کې د ټاکنو د خپلواک کمېسیون مشر فضل احمد حیات ازادي راډیو سره په خبرو کې وویل چې د بلخ په چمتال ولسوالۍ کې نا امنۍ د رأیې ورکوونکو د نوم ثبتونې ۱۳ مرکزونه بند کړي.
ښاغلي حیات وویل، د دې ولایت په چهاربولک ولسوالۍ کې هم د روانې جګړې له امله د رأیې ورکونې د کارتونو د وېش څو مرکزونه تر لوړ تهدید لاندې دي او نشي کولای چې په دوامداره توګه فعالیت وکړي.
ښاغلي حیات وویل:
"په بلخ ولایت کې په مجموعي ډول ۳۱۴ مرکزونه موجود دي چې ۲۶۴ یې په ولسوالیو او ۵۰ نور یې په مزارشریف ښار کې دي، په دې مرکزونو کې ښځینه څانګې بېلې دي، په بلخ کې د رأیې ورکونې د کارتونو د وېش ۱۳ مرکزونه د نا امنۍ له امله بند دي. "
خو د بلخ د امنیې قوماندانۍ چارواکي د یادو مرکزونو د بېرته پرانيستلو او یا هم د نورو مرکزونو د امنیت د خوندي ساتنې لپاره رسنیو سره خبرو ته حاضر نه دي.