په تېرو ۲۴ ساعتونو کې ۴ فلسطینیان د اسرائیلي ځواک په ډزو کې وژل شوي
د غزې تراړې روغتیايي چارواکي وايي، په تېرو ۲۴ ساعتونو کې ۴ فلسطینیان د اسرائیلي ځواکونو په ډزو کې وژل شوي دي.
دغه راز ۲۰۰ نور فلسطینیان چې یو خبریال هم په کې شامل دی، په سیمه کې د تازه تاوتریخوالي په نتیجه کې ژوبل شوي دي.
له یوې میاشتې راهيسې چې د غزې اوسېدونکو د غزې د پولې په اوږدو کې مظاهرې پیل کړي، اسرائیلي ځواکونو ۴۲ فلسطینیان وژلي او تر پنځو زرو زیات نور یې ټپیان کړي دي.
اعتراض کوونکي فلسطینیان غوښتنه کوي چې دوی ته دې هغو سیمو ته بېرته د ستنېدو اجازه ورکړل شي چې اسرائیلو لاندې کړې دي.
د اسرائیل پوځ وايي، د غزې له ۱۲ زرو تر ۱۴ زرو پورې اوسېدونکو پاڅون کړی او یو شمېر له دوی هڅه کوله چې له پولې د اسرائیل خاورې ته واوړي.
د اسرائیل پوځ ویلي چې سرتېرو یې ددې کسانو د مخنیوي لپاره د ټاکلو مقرارتو په چوکاټ کې اقدام کړی دی.
د ملګرو ملتونو د بشري حقونو د ادارې رئیس پر اسرائیلو د اعتراض کوونکو په وړاندې له حده د زیات زور د کارولو په خاطر انتقاد وکړ.
پخواني معلومات:
په غزه کې روغتیايي چارواکي وايي، اسرائیلي ځواکونو د جمعې په ورځ د غزې د پولې په اوږدو کې درې تنه معترضان په ډزو وژلي دي.
د دې پېښې په اړه څو ساعته وروسته له هغې خبر ورکړل شو چې د ملګرو ملتونو د بشري حقونو د ادارې رئیس پر اسرائیلو د اعتراض کوونکو په وړاندې له حده د زیات ځواک کارولو په خاطر انتقاد وکړ.
له یوې میاشتې راهيسې چې د غزې اوسېدونکو د غزې د پولې په اوږدو کې مظاهرې پیل کړي، اسرائیلي ځواکونو ۴۱ فلسطینیان وژلي او تر پنځو زرو زیات نور یې ټپیان کړي دي.
اعتراض کوونکي غوښتنه کوي چې دوی ته دې هغو سیمو ته بېرته د ستنېدو اجازه ورکړل شي چې اسرائیلو لاندې کړې دي.
د غزې روغتیايي چارواکو ویلي، دوه نور اعتراض کوونکي چې په مرمیو لګېدلي، دا مهال په روغتون کې په ناوړه روغتیايي وضعيت کې دي.
همدارنګه ۶۰۰ نور هغه مهال ټپیان شول چې اسرائیلي پوځ پر اعتراض کوونکو ډزې وکړې او پر هغوی یې اوښکې بهوونکی ګاز وکاراوه.
د اسرائیلو پوځ وايي، د غزې له ۱۲ زرو تر ۱۴ زرو پورې اوسېدونکو پاڅون کړی او یو شمېر له دوی هڅه کوله چې له پولې د اسرائیلو خاورې ته واوړي.
د اسرائیلو پوځ ویلي چې سرتېرو یې ددې کسانو د مخنیوي لپاره د ټاکلو مقرارتو په چوکاټ کې، اقدام کړی دی.