بلخي: په تېرو ۳میاشتو کې ۱۶۰۰افغان کډوال له ترکیې راستانه شوي
سيد حسين عالمي بلخي ازادي راډيو ته وويل چې له ترکيې د افغان کډوالو پر ستنولو او نورو ستونزو د بحث لپاره د کډوالو او راستنېدونکو چارو وزارت يو هيئت ترکيې ته تللى دى:
"د روان مېلادي کال په لومړيو درېيو مياشتو کې ١٦٠٠ کسان افغانستان ته ستانه شوي دي، د کډوالو او راستنېدونکو چارو وزارت معين پرون او وړمه ورځ ترکيې ته د سفر پر مهال يې له ترکي چارواکو سره خبرې وکړې، اوس د دوى راپور ته منتظر يو چې پوه شو په ترکيه کې افغان پناه غوښتونکي څه وضعيت لري او څه کولاى شو."
تر دې مخکې راپور ورکړل شوى و چې د ترکيې چارواکو پرېکړه کړې چې نږدې ٦٠٠ افغان پناه غوښتونکي نن شنبه او سبا افغانستان ته ستانه کړي.
د کډوالو او راستنېدونکو چارو وزير وايي، اروپا ته تللې لارې خطرناکې دي، ځکه نو په تېرو درېيو مياشتو کې په هرو ١۴ کسانو کې چې غوښتل يې اروپايي هېوادونو ته لاړ شي، يو تن د مديترانې په سمندرګي کې مړ شوى دى.