چارواکي: په خاص ارزګان ولسوالۍ کې څه باندې ٢٠ وسله وال وژل شوي
د دې قول اردو وياند محمد صادق عيسى نن یکشنبه رسنيو ته وويل، دغه عمليات په تېرو ٢٤ ساعتونو کې د افغان ګډو ځواکونو له خوا شوي دي.
دی زیاتوي:
"په دغو عملياتو کې ٢٢ تنه وسله وال ترورېستان وژل شوي، ۱۰ تنه يې ټپيان دي؛ يو ميل پيکا، يو ميل کلاشينکوف د دفاعي او امنيتي ځواکونو لاس ته ورغلي او د دښمن په زياته پيمانه درنې وسلې له منځه وړل شوې دي."
تر دې مخکې د ارزګان امنیه قوماندان مل پاسوال رحمت الله صدیقي ازادي راډيو ته ويلي وو، د وسله والو طالبانو لاس ته د خاص اروزګان ولسوالۍ د لوېدو خطر له منځه تللى دى.
د دولت کومې مخالفې ډلې تر اوسه په دې اړه تبصره نه ده کړې.