د افغان حکومت او طالبانو استازو په ترکیه کې خبرې کړي
د دغې غونډې په اړه هغه ویډیو چې ازادي راډیو ته رارسېدلې، پکې لیدل کېږي چې د افغان حکومت په استازیتوب د ولسمشر سلاکاران بصیر عباس او همایون جریر د طالبانو له څلورو استازو سره خبرې کوي.
یوې سرچینې ازادي راډیو ته وویل چې په ویډیو کې موجوده څلور کسان د طالبانو د حقاني شبکې او کوټې شورا په استازیتوب د افغان حکومت له استازو سره خبرې کوي.
دغو کسانو یوه اعلامیه هم خپره کړې چې پکې د خبرو د پرمختګ او هیله مندۍ خبره شوې ده.
تراوسه د دغې ویډیو په اړه افغان حکومت څه نه دي ویلي، خو تېره ورځ په حزب اسلامي کې ځینو سرچینو ازادي راډیو ته ویلي وو چې د دوی په منځګړيتوب په ترکیه کې د حکومت او طالبانو ترمنځ د سولې خبرې پیل شوې دي.