روسیه وايي په سوریه کې د دوی پر اډه برید کوونکی وژلی
د روسيې دفاع وزارت وايي، بې پیلوټه الوتکو يې د سوريې په ادلب ښار کې ګڼ شمېر وسله وال چې په یوه بس کې سپاره وو،په نښه او له منځه یوړل.
د سوريې په لاذقیه ښار کې د روسيې پر پوځې اډه د تېرې ډسمبر میاشتې په ۳۱ نېټه وسله والو د درنو وسله حمله کړې وه چې دوه سرتېري پکې وژل شوي وو.
که څه هم چې کرېملېن دا رد کړه چې په دغې برید کې دې کومه الوتکه له منځه تللې وي، خو د کومیرسنات روسیې سوداګریځې ورځپاڼې د خبر له مخې ۷ روسۍ الوتکې د ډسمبر د یو دېرشمې په برید کې له منځه تللي دي.
روسيې په ۲۰۱۵ مېلادي کال کې په سوریه کې د وسله والو د ځپلو لپاره د بشار اسد د رژیم په ملاتړ هوايي بریدونه پیل کړل.