پاکستان وايي، د ډیورند کرښې په اوږدو کې۱۵۰کېلومتره ازغن سیم نصب کړی
پاکستاني رسنیو پرون پنجشنبه راپور ورکړ چې د دغه هېواد پوځ په تېرو شپږ میاشتو کې له افغانستان سره د ډیورند کرښې په حساسو برخو کې ۱۵۰ کېلومتره ازغن سیم تېر کړی دی.
د افغانستان او پاکستان ترمنځ د ډیورند کرښه شاوخوا دوه زره څلور سوه دېرش کېلو متره اوږدوالی لري.
د پاکستاني رسنیو پر اساس ازغن سیم په هغو سیمو کې تېر شوی چې د پاکستاني پوځ په وینا د خلکو تک راتګ پکې ډېر و.
افغانستان د پاکستان له لوري د دیورند کرښې په اوږدو کې په یو اړخیز ډول د کټارو او ازغن سیم له درولو سره مخالفت کړی دی.
د پاکستان د پوځ ۱۴ جزوتامونه، چې ۱۲ زره سرتېري پکې شامل دي، د ډیورنډ کرښې په اوږدو کې په ۱۴ سیمو کې د ازغن سیم د تېرولو په کار بوخت دي.