На следната владина седница ќе се одлучува за Недела неработен ден

Предлогот недела да се прогласи за неработен ден следната недела се очекува да се најде на разгледување на владина седница, информираше денеска владиниот портпарол Мухамет Хоџа.

„Министерството за труд и социјална политика е посветено да достави предлог до владата, но како што сте информирани овој оддел е во консултации со приватниот сектор, стопанските комори и другите министерства, очекуваме овие консултации да бидат завршени за брзо време и предлогот неделата да биде неработен ден ќе се најде на владината седница и очекуваме дека тоа ќе се случи следната недела“, рече Хоџа на денешната прес-конференција во Владата.

КСС: Недела ден за одмор, а за тие што ќе работат поголема дневница

Предлогот недела да биде неработен ден, кој дојде од дел од синдикатите, а Владата го прифати, наиде на критика кај дел од работодавците. Конфедерацијата на слободни синдикати на Македонија (КСС) вчера објави дека предлага недела да биде ден за одмор, а секоја работа во недела да се пресметува како прекувремена работа и да се исплаќа дневница зголемена за 50 отсто.