На базен со маска и на растојание, не важат веќе правилата за седење во кафулиња и кафеани
Освен задолжителното почитување на основните превентивни мерки за носење маска и физичка дистанца од 1,5 – 2 метри и на плажа и во вода, често миење на рацете со вода и сапун, и редовно чистење и дезинфекција на околината на плажите, протоколот за плажите предвидува и информирање на посетителите на почитување на мерките. Тоа треба да се прави со видливо истакнат едукативен материјал и со гласовно информирање. Протоколот предвидува и ограничување на бројот на посетители на плажата согласно квадратурата, односно максимум 15 посетители на 100 м² нето површина. Задолжителна дистанца треба да има и меѓу лежалките и соседните чадори, а луѓето пред да употребат лежалка треба да си постават пешкир врз неа.
Дали е безбедно да патувате летово?
Се забрануваат групните спортови (како одбојка на плажа), и задолжително е одредувањето лица кои ќе го контролираат бројот на посетителии спроведувањето на мерките. На плажите не се препорачува користење на гардероби на плажа.
Што се однесува до базените и таму ќе важат истите правила за заштитна на лицето и растојание. Растојание да се почитува и на билетара и се препорачува плаќање со картичка или да се обезбеди онлајн купување на билети.
Пред влезот на базените задолжително е да се постави подлога за дезинфекција на сите посетители и да се обезбеди средство за дезинфекција на рацете.При влез во базенот посетителот треба да се истушира и да помине преку базата за миење на нозете.
Со протоколот се ограничува бројот на посетители во објектот согласно квадратурата на објектот, максимум 15 посетители на 100 м² нето површина (вклучително и површината на базенот)или еден пливач на 7 м² во базенот.
На базените не се препорачува користење на угостителски услуги, а базените во хотелите да ги користат само гостите од хотелот.
Владата денеска донесе и измени и дополнувања на протоколите за работа на кафулињата и на угостителските објекти за исхрана со кои се укинуваат ограничувањата за седење на две лица на една маса, како и ограничувањето со кое се определуваше дека на една маса можат да седат четворица само ако се од исто семејство.