ეუთოს დასკვნას ოპოზიცია სკეპტიკურად უყურებს და მისიის წარმომადგენლების რეპუტაციას კითხვის ნიშნის ქვეშ აყენებს
საქართველოში მოქმედი პოლიტიკური პარტიები, რომლებმაც 31 ოქტომბრის საპარლამენტო არჩევნებზე 1%-იანი ბარიერი გადალახეს და მანდატები მოიპოვეს, ეუთოს საპარლამენტო ასამბლეის დასკვნას აფასებენ.
ოპოზიციაში ამბობენ, რომ ჩიხი და პოლარიზაცია, რომელზეც საერთაშორისო პარტნიორები საუბრობენ, ხელისუფლებამ შექმნა.
ოპოზიციური პარტიების წარმომადგენლები ამბობენ, რომ არ აპირებენ არჩევნების შედეგების აღიარებას და მეათე მოწვევის პარლამენტში მუშაობის დაწყებას.
ოპოზიციის ნაწილმა, დღეს ეუთოს მისიის წარმომადგენლების რეპუტაციია კითხვის ნიშნის ქვეშ დააყენა.
“ანუ არ გაყალბდა არჩევნებიო? არ გავცნობივარ განცხადებას, არ ვიცი რას მომიწოდებს რამდენიმე ადამიანი, რომელიც “ქაართული ოცნების” მაღალი თანამდებობის პირების დაბადების დღეზე რომ აღმოჩნდნენ ადამიანები, არჩევნების წინა ღამეს და ფოტოები რომ გავრცელდა, თუ ამ ადამიანებზე საუბრობთ და ამათი დასკვნაა არ ვიცი,”- აცხადებს “ერთიანი ნაციონალური მოძრაობის” პოლიტიკური საბჭოს თავმჯდომარე ნიკა მელია.
“მიტაცებულმა ამომრჩევლის ნებამ შექმნა უპრეცენდენტო რეალობა საქართველოსთვის და მათ შორის, მსოფლიოს ბევრი ქვეყნისთვისაც, როდესაც არცერთი პოლიტიკური პარტია, არც ბარიერგადალახული და არც ბარიერგადაულახავი არ აღიარებს ამ შედეგს. არსებობს კონსესუსი, ბარიერგადალახულ პარტიებს შორის, რომ არცერთი არ აპირებს არჩევნების შედეგების აღიარებას იმ გაყალბების გამო, რომელიც დაუსვა “ქართულმა ოცნებამ”. თუკი პოლტიკური კრიზისი და ჩიხი არის ქვეყანაში, ის შექმნა ხელისუფლებამ. გამოსავალი ამ ჩიხური მდგომარეობიდან არის ის, რომ დაინიშნოს ხელახალი არჩევნები,”-აცხადებს “ევროპული საქართველო – მოძრაობა თავისუფლებისთვის” პოლიტიკური საბჭოს წევრი ირაკლი აბესაძე.
“ჩიხიდან გამოსვლა დამოკიდებულია ქართულ ოცნებაზე”, ხელისუფლებაზე, იმიტომ რომ მოლაპარაკებები მიმდინარეობს, ჩვენი მოთხოვნები ცნობილია, ველოდებით შემხვედრს წინადადებას, ამაზე შეიძლება დისკუსია და მოხდეს მოლაპარაკება. თუ მეორე მხარე შემხვედრი წინადადებით არ მოვიდა, ვერ მოხდება მოლაპარაკება, რაც არ უნდა დაწეროს ეუთომ, თუ სხვა ორგანიზაციამ,”- აცხადებს პარტია “სტრატეგია აღმაშენებელის” პოლიტიკური საბჭოს წევრი სერგო ჩიხლაძე.
შეგახსენებთ, ეუთოს საპარლამენტო ასამბლეის ლიდერები პოლიტიკურ პარტიებს საქართველოში პოლარიზაციის დაძლევისკენ მოუწოდებენ. ეუთოს საპარლამენტო ასამბლეის ვებგვერდზე გამოქვეყნებულ განცხადებაში ეუთო-ს სადამკვირვებლო მისიის ლიდერებმა კიდევ ერთხელ აღნიშნეს, რომ საჭიროა პოლიტიკური ჩიხის გადალახვა, რათა უზრუნველყოფილი იყოს ამომრჩეველთა ნების პატივისცემა.
მოკლევადიანი სადამკვირვებლო მისიის სპეციალური კოორდინატორის, ილონა ჰოქსას განცხადებით, საჩივრების განხილვის შემდეგ ყველა არჩეულმა პოლიტიკურმა პარტიამ უნდა მიიღოს თავისი მანდატი და შევიდეს პარლამენტში.