გამყრელიძე: რაკი ეკლესიებში ნაკლები ადამიანი მივიდა, რისკი შემცირებულია, თუმცა არა განულებული
დაავადებათა კონტროლის ეროვნული ცენტრის ხელმძღვანელის, ამირან გამყრელიძის თქმით, აღდგომის ღამით ეკლესიებში იმდენი ადამიანი რომ მისულიყო, რამდენიც ჩვეულებრივად დადის ხოლმე, კორონავირუსის გავრცელების რისკი გაცილებით მაღალი იქნებოდა. როგორც მან საინფორმაციო სააგენტო „ინტერპრესნიუსს“ განუცხადა, ამჯერად, რაკი ეკლესიებში ბევრად ნაკლები ადამიანი მივიდა, რისკი შემცირებულია, თუმცა არა განულებული:
„მადლობა მინდა გადავუხადო მრევლს, იმ უმეტეს ნაწილს, ვინც გაითვალისწინა რეკომენდაციები და გუშინ სააღდგომო ლიტურგია სხვა ფორმატით გაითავისა და არ მიბრძანდა ტაძრებში, რითაც შეამცირა რისკი ინფექციის შემდგომი გავრცელების. ასევე, მადლობა მინდა ვუთხრა მრევლს, რომელიც მიბრძანდა ტაძარში, მაგრამ დაიცვა ყველა ის რეკომენდაცია, რასაც საპატრიარქო და საქართველოს სახელმწიფო იძლეოდა, იყო დისტანცირება, ნაკლები რაოდენობა ხალხის და იდგნენ იმ ადგილზე, რომელიც სპეციალურად იყო გამოყოფილი“.
როგორც ამირან გამყრელიძე საინფორმაციო სააგენტოს ეუბნება, შემთხვევათა მატება იქნება, ამიტომ მოსახლეობამ სოციალური დისტანცირების რეკომენდაცია მაქსიმალურად უნდა გაითვალისწინოს ნებისმიერ საჯარო სივრცეში, მათ შორის, ტაძრებშიც:
„ჩვენ დამშვიდების საფუძველი არ გვაქვს, შემთხვევების ზრდა ქვეყანაში იქნება, ჯერჯერობით ჩვენი ე.წ. მრუდი აღმავალია. შიდა გავრცელება როგორც კი იწყება ქვეყანაში, იქიდან მე-6, მე-7, მე-8 კვირები არის ყველაზე რთული. ჩვენ შიდა გავრცელება დაგვეწყო მარტის 22-23 რიცხვში, დაახლოებით 4 კვირა შევასრულეთ, მე-5 კვირაში შევდივართ, ამიტომ ვამბობდით, რომ აპრილის ბოლო კვირები, მაისის პირველი ორი კვირა იქნება უფრო საფრთხილო და უფრო რთული. შემთხვევების ზრდა, დიდი ალბათობით, გვექნება, ამიტომ ყველამ უნდა დავიცვათ ის წესი, რასაც სახელმწიფო, ჯანდაცვის უწყება და დაავადებათა კონტროლის ცენტრი გასცემს. ეს არის სოციალური დისტანცირება, სხვა ამას ვერაფერი აჩერებს. საკმაოდ სერიოზული რისკი არსებობს, რომ ზრდა გვექნება ამიტომ ეს 3-4 კვირა არ უნდა მოვეშვათ, არ უნდა შევამსუბუქოთ ღონისძიებები, რომელიც ტარდება, თუ გვინდა ეს დუნე მატება შევინარჩუნოთ, რომელსაც ერევა ჯანდაცვის სისტემა, გამოჯანმრთელების საკმაოდ მაღალი პროცენტი გვაქვს, სახელმწიფო დროულად რეაგირებს, ამიტომ ჩვენ თუ დავიცავთ ყველა ღონისძიებას, გამოვალთ ნაკლები დაზიანებით“.
ინფექციონისტთა და ეპიდემიოლოგთა ნაწილი მიიჩნევს, რომ მიუხედავად იმისა, რომ აღდგომის ღამეს, ეკლესიებში მეტ-ნაკლებად დაცული იყო უსაფრთხოების ნორმები, მოქალაქეებმა, რომლებიც სააღდგომო ლიტურგიას დაესწრნენ და ეზიარნენ, მომდევნო ორი კვირის განმავლობაში, თვითიზოლაციის წესები უნდა დაიცვან, რათა არ გახდნენ ინფიცირების წყარო.