ნატოს მინისტერიალმა მხარი დაუჭირა საქართველოსა და უკრაინისათვის დახმარების ახალ პაკეტს
ნატოს საგარეო საქმეთა მინისტრებმა 2 აპრილს მხარი დაუჭირეს საქართველოსა და უკრაინისათვის დახმარების ახალ პაკეტს, რომელმაც უნდა გააძლიეროს ამ ქვეყნების თავდაცვითუნარიანობა და ნატოს ალიანსთან თავსებადობა. ამის შესახებ ნატოს გენერალურმა მდივანმა, იენს სტოლტენბერგმა 2 აპრილს განაცხადა, ალიანსის ისტორიაში პირველად ვიდოეკონფერენციის ფორმატში გამართული მინისტერიალის დასრულების შემდეგ.
დახმარება, იენს სტოლტენბერგის თქმით, გულისხმობს წვრთნების ჩატარებას შავი ზღვის რეგიონში, რომელიც სტრატეგიულად მნიშვნელოვანია ნატოსთვის. ასევე უფრო მეტ საგანმანათლებლო და პრაქტიკულ ვარჯიშებს უკვე არსებული პროგრამების ფარგლებში.
„ჩვენ გადავწყვიტეთ უფრო გავაღრმავოთ საქართველოსთან და უკრაინასთან ჩვენი პარტნიორობა, მათ შორის შავი ზღვის სტრატეგიულად მნიშვნელოვან რეგიონში წვრთნების საშუალებით, შემდეგ კიდევ ერთობლივი საქმიანობით კიბერსაფრთხეების წინააღმდეგ და, ასევე, საჰარეო სივრცეში მომხდარ გადაადგილებებზე, რადიოლოკაციური მონაცემთა გაცვლით, რათა ცა გავხადოთ ყველასათვის უსაფრთხო“, - განაცხადა იენს სტოლტენბერგმა მინისტერიალის დასრულების შემედეგ გამართულ ვირტუალურ პრესკონფერენციაზე, რომელზეც კრონავირუსის გამო თვითიზოლაციაში მყოფი ჟურნალისტები სხვადასხვა ქვეყნებიდან ინტერნეტით უსვამდნენ შეკითხვებს ნატოს გენერალურ მდივანს.
აღსანიშნავია, რომ ხუთი წლის წინ საქართველომ ნატოს უელსის სამიტზე მიიღო „არსებითი პაკეტი“, რომელიც ყოველწლიურ ეროვნულ პროგრამასა და ნატო-საქართველოს კომისიასთან ერთად, ქვეყნის ალიანსში გაწევრიანების მოსამზადებელ პრაქტიკულ ინსტრუმენტებს წარმოადგენს.
ნატოს 2 აპრილის მინისტერიალის დღის წესრიგის ერთ-ერთ უმთავრეს საკითხს წარმოადგენა ალიანისის წინაშე მდგარი გამოწვევები კორონავირუსის პანდემიის წინააღმდეგ ბრძოლაში.