მალხაზ მაჩალიკაშვილი: „ჩემი ბრძოლა უშედეგო არ არის“
„იყო ერთი კარავი - თემირლანის საქმესთან დაკავშირებით, გვერდით გაიშალა კარავი - გიორგი მამალაძის საქმესთან დაკავშირებით, ეხლა ეს მესამეა - გავრილოვის პირადი პატიმრების, ივანიშვილის პატიმრების კარავი... ამათ კიდევ ბევრი კარავი დაემატება.
აი, ოქტომბრის ბოლოს მე მოვამთავრებ ჩემი ხელმოწერების მოგროვებას. შემდგომში მე გავაკეთებ განცხადებას, რომ ხალხი გამოვიდეს. დავაანონსებ აქციას. იმ ხალხს, რომელსაც მე დავუძახებ და რომელიც გამოვა გარეთ, ისინი უკვე სახლში არ წავლენ, სანამ ყველაფერს პასუხი არ გაეცემა თემირლანის საქმესთან დაკავშირებით“, - განაცხადა მალხაზ მაჩალიკაშვილმა.
პარლამენტის შენობის წინ 20-21 ივნისის, ეგრეთ წოდებული გავრილოვის ღამის საქმეზე დაკავებული პირების კარავი 22 სექტემბერს გაიშალა. როგორც პოლიტიკური მოძრაობა „გამარჯვებული საქართველოს“ ერთ-ერთმა ლიდერმა გურამ ჩალაგაშვილმა განაცხადა, კარავი არის დაკავებული პოლიტპატიმრების მხარდაჭერის ერთ-ერთი ფორმა და პროტესტი გაგრძელდება მანამ, სანამ ისინი არ გათავისუფლდებიან.
ამ დროისათვის პატიმრობაში მყოფ 14 პირს შორისაა მალხაზ მაჩალიკაშვილის ძმისშვილი, მორის (ჰუსეინ) მაჩალიკაშვილი.
20-21 ივნისის საქმეზე 19 პირი დააკავეს. საქმე 225-ე მუხლის პირველი და მეორე ნაწილებით 21 პირის მიმართ აღიძრა. პროკურატურა ბრალდებულებს ჯგუფური ძალადობის ორგანიზებასა და მასში მონაწილეობას ედავება.