ესპანეთში ბოლო ოთხ წელიწადში მეოთხე საპარლამენტო არჩევნები დაინიშნა
ესპანეთში ვადამდელი საპარლამენტო არჩევნები 10 ნოემბერს ჩატარდება. ამის შესახებ განაცხადა ესპანეთის პრემიერ-მინისტრის მოვალეობის შემსრულებელმა, სოციალისტმა პედრო სანჩესმა. მან ოპოზიციას დააკისრა პასუხისმგებლობა იმაზე, რომ შეუძლებელი აღმოჩნდა მთავრობის ფორმირებისთვის საჭირო საპარლამენტო კოალიციის შექმნა.
ვადამდელი არჩევნების დანიშვნის გადაწყვეტილებას წინ უძღოდა რამდენიმეთვიანი უშედეგო მოლაპარაკება. 17 სექტემბერს, საპარლამენტო პარტიების ლიდერებთან შეხვედრის შემდეგ, ესპანეთის მეფე ფელიპე მეექვსემ საბოლოოდ გადაწყვიტა, რომ პრემიერ-მინისტრობის არცერთ პოტენციურ კანდიდატს არ დაასახელებს.
2019 წლის აპრილში ჩატარებულ საპარლამენტო არჩევნებში ყველაზე მეტი ხმა მიიღო ესპანეთის სოციალისტურმა პარტიამ, თუმცა, ვერ მოიპოვა მთავრობის დამოუკიდებლად ფორმირებისთვის საჭირო უმრავლესობა. სოციალისტების მოკავშირედ მოიაზრებოდა მემარცხენე პოპულისტების პარტია „პოდემოსი“, თუმცა, მათ შეთანხმება ვერ შეძლეს.
10 ნოემბერს დანიშნული ვადამდელი საპარლამენტო არჩევნები ბოლო ოთხ წელიწადში მეოთხეა.