ერდოანი პუტინს და როჰანის მასპინძლობს, სირიის ომზე სალაპარაკოდ
თურქეთის პრეზიდენტი, რეჯეპ ტაიპ ერდოანი ანკარაში მასპინძლობს რუსეთის და ირანის პრეზიდენტებს, სირიის შესახებ მოლაპარაკების მიზნით.
გავრცელებული ცნობებით, ერდოანი, რუსეთის პრეზიდენტი ვლადიმირ პუტინი და ირანის პრეზიდენტი ჰასან როჰანი საუბრობენ სირიის ხელისუფლების წინსვლაზე ჩრდილო-დასავლეთის რეგიონ იდლიბისკენ, რომელიც მეამბოხეთა უკანასკნელ ბასტიონს წარმოადგენს.
რუსეთმა და თურქეთმა შარშან ხელი მოაწერეს შეთანხმებას ბუფერულ ზონებზე, რომელსაც იდლიბი უნდა დაეცვა მთავრობის შეტევისგან. ამ შეთანხმების დაცვის მიზნით ანკარა ამ რაიონში 12 სადამკვირვებლო პოსტს ამუშავებს, თუმცა შიშობს, რომ იდლიბს შეუტევენ სირიის ძალები, რომლებსაც რუსეთის საჰაერო მხარდაჭერა აძლიერებს.
2017 წლის ნოემბრის შემდეგ ეს ამ სამი ქვეყნის მეხუთე სამიტია სირიის სამოქალაქო ომის შესახებ. რუსეთი და ირანი მხარს უჭერენ სირიის პრეზიდენტს, ბაშარ ალ-ასადს, თურქეთი კი მისი წინააღმდეგია და ზოგიერთ მეამბოხე ჯგუფს უმაგრებს ზურგს.