პრაღაში მეორე მსოფლიო ომის დროინდელი მარშლის ძეგლის გადატანამ მოსკოვის გაბრაზება გამოიწვია
პრაღის მე-6 რაიონის მუნიციპალიტეტის საბჭოს გადაწყვეტილებამ, მეორე მსოფლიო ომის პერიოდის საბჭოთა მარშალ კონევის ძეგლი მუზეუმში გადაიტანოს, დიპლომატიური დაძაბულობა გამოიწვია რუსეთსა და ჩეხეთის რესპუბლიკას შორის.
ჩეხეთის საგარეო საქმეთა სამინისტრომ მიიწვია ჩეხეთში რუსეთის ელჩი მოსკოვში რუსი კანონმდებლის გამონათქვამის გამო, რომელმაც ქალაქის იმ რაიონის მერს, სადაც ძეგლის გადატანას უყარეს კენჭი, ნაცისტური მთავრობის რეგიონული მმართველი უწოდა.
ამის ფონზე, რუსეთის საგარეო საქმეთა სამინისტრომ გადაწყვეტილების თაობაზე განაცხადა, რომ ის „არ დარჩება უპასუხოდ“.
პრაღის მეექვსე რაიონის მერმა, ონდჟეი კოლარჟმა ძეგლის გარშემო ხარაჩოები ააგებინა და ძეგლი დაფარეს, რასაც საზოგადოებაში აზრთა სხვადასხვაობა მოჰყვა. პრორუსულმა ძალებმა ძეგლს საფარველი მოხსნეს და ბევრმა მასთან ყვავილები მიტანა. რუსეთის კულტურის მინისტრმა ვლადიმირ მედინსკიმ კოლარჟი „ნაცისტს“ შეადარა, როცა ის ძეგლის სხვაგან გადატანის ინიციატივით გამოვიდა.
მარშალ კონევის ძეგლი, რომელიც 1980 წელს დაიდგა პრაღა 6-ში, უკვე რამდენიმე წელია, დავის საგანია ჩეხეთის საზოგადოებაში. დემონტაჟის მოწინააღმდეგეები აცხადებენ, რომ სწორედ კონევის ჯარებმა გაათავისუფლეს პრაღა 1945 წლის 9 მაისს. დემონტაჟის მომხრეები კი მიუთითებენ კონევის როლზე უნგრეთის 1956 წლის ეროვნული აჯანყების ჩახშობაში და მის მონაწილეობაზე ჩეხოსლოვაკიაში 1968 წელს ვარშავის ხელშეკრულების ქვეყნების ჯარების შეყვანაში, ასევე იმაზე, რომ 1945 წლის მაისში პრაღაში საბჭოთა ჯარების მისვლისთვის გერმანელებს უკვე ფაქტობრივად კაპიტულაცია ჰქონდათ გამოცხადებული.
უკანასკნელი წლების განმავლობაში დაუდგენელი პირები რეგულარულად ასხამენ კონევის ძეგლს საღებავს. უკანასკნელი ასეთი შემთხვევა მოხდა 21 აგვისტოს, ჩეხოსლოვაკიაში საბჭოთა ჯარების შესვლის წლისთავზე. პრაღის მე-6 რაიონის მუნიციპალიტეტის დეპუტატთა საბჭომ ხუთშაბათს მიიღო გადაწყვეტილება, რაიონის ტერიტორიიდან გადაიტანოს საბჭოთა მარშლის, ივან კონევის ძეგლი - სავარაუდოდ, მუზეუმში. ჯერჯერობით არაა ცნობილი, როდის მოხდება ეს. მის ადგილზე ნაციზმისგან პრაღის განმათავისუფლებელთა ახალი ძეგლი დაიდგმება.