შალვა ნათელაშვილი: დავით გარეჯი ბიძინა ივანიშვილმა გაყიდა
ბიძინა ივანიშვილმა დავით გარეჯი აზერბაიჯანის პრეზიდენტს მიჰყიდა, - აცხადებს „ლეიბორისტული პარტიის“ ლიდერი შალვა ნათელაშვილი.
ის მოითხოვს, შეწყდეს ერთობლივი კომისიის ფორმატში მიმდინარე მოლაპარაკებები საზღვრის დელიმიტაციასთან დაკავშირებით მანამდე, ვიდრე პროცესებში ევროკავშირი და ამერიკის შეერთებული შტატები ჩაერთვება.
“ახალი ეპოქის სერგო ორჯონიკიძემ, ბიძინა ივანიშვილმა, დავით გარეჯი მიჰყიდა თავის ბიზნესპარტნიორ აზერბაიჯანის პრეზიდენტს, ოლიგარქ ილჰამ ალიევს.
გაცხარებული ტემპებით მიდის ამ წუთშიც მუშაობა, რათა ეს ქართული უძველესი სიწმინდე საბოლოოდ იქნას ოკუპირებული.
მოვითხოვთ, დაუყოვნებლივ დაიშალოს ე.წ. მოღალატეობრივი დელიმიტაციის კომისია, შეწყდეს ყოველგვარი მოლაპარაკებები, სანამ ფორმატში არ ჩაერთვება ევროკავშირი და ამერიკის შეერთებული შტატები. შესაბამისი წერილები გაგზავნილია“,- აცხადებს ნათელაშვილი.
სამოქალაქო აქტივისტები დავით გარეჯიდან ავრცელებენ ვიდეოკადრებს, სადაც აზერბაიჯანის მხრიდან ბულდოზერებით მუშაობის პროცესი ჩანს.
ანტისაოკუპაციო მოძრაობა "ძალა ერთობაშიას" წევრი დავით ქაცარავა ფეისბუკზე წერს, რომ მესაზღვრეები ამ დრომდე არ უშვებენ აქტივისტებს ჩიჩხიტურისა და უდაბნოს მონასტერში.
24 მაისს ბაქოში გრძელდება ერთობლივი კომისიის ფორმატში მიმდინარე მოლაპარაკებების მორიგი რაუნდი, რომელიც საქართველო-აზერბაიჯანის საზღვრის დელიმიტაციის საკითხს შეეხება.