ოთარ კახიძე: ახლა არა აქციების, არამედ მათაწმინდის მეორე ტურზე კონცენტრირების დროა
საპროტესტო აქციაში ჩვენ არ ვმონაწილეობთ, ოპოზიციური ძალები მთაწმინდაზე სახელისუფლებო კანდიდატის დასამარცხებლად უნდა გაერთიანდნენ, - განაცხადა „ევროპული საქართველოს“ წარმომადგენელმა დეპუტატმა, ოთარ კახიძემ „ნაციონალური მოძრაობის“ ერთი ნაწილის მიერ საპროტესტო აქციების დაანონსების შესახებ.
მისი თქმით, კონსტიტუციით დაცულია გამოხატვის თავისუფლება და პროტესტის მშვიდობიანად გამოხატვის უფლება აქვს ყველა ადამიანსა და პოლიტიკურ გაერთიანებას. ამასთან, სამართლიანია პროტესტი, რომელიც უკავშირდება არჩევნებზე და საარჩევნო პროცესში გამოვლენილ არაერთ დარღვევას. თუმცა ამ ეტაპზე "ევროპული საქართველოს" ძალისხმევა სხვა მიმართულებით არის კონცენტრირებული.
„ყველა მიტინგსა და აქციას აქვს თავისი დრო. ჩვენთვის მნიშვნელოვანი და პრიორიტეტულია არჩევნების მეორე ტური დედაქალაქის ცენტრში. შალვა შავგულიძე, "ევროპული საქართველოსა და თავისუფალი დემოკრატების" ბლოკის კანდიდატი მეორე ტურშია, სახელისუფლებო კანდიდატთან ერთად და ჩვენ უნდა ვკონცენტრირდეთ ამ ბრძოლაზე.
ეს არის გარდამტეხი ეტაპი იმისთვის, რომ მომდევნო საპარლამენტო არჩევნებზე დავამარცხოთ და გავისტუმროთ ივანიშვილი ხელისუფლებიდან, შედგეს ფართო პოლიტიკური კოალიცია "ევროპული საქართველოსა და თავისუფალი დემოკრატების" გარშემო და შავგულიძის გამარჯვება იყოს საეტაპო ამ დიდ ბრძოლაში. ჩვენ გვაქვს ჩვენი გზა, ჩვენი ბრძოლა, რომელიც ამ შემთხვევაში მთაწმინდაზე გადის", - განაცხადა ოთარ კახიძემ.