სომხეთში სასამართლომ წინასწარი პატიმრობიდან გაათავისუფლა ექსპრეზიდენტი ქოჩარიანი
სომხეთში სასამართლომ წინასწარი პატიმრობიდან გაათავისუფლა ყოფილი პრეზიდენტი, რობერტ ქოჩარიანი, მას შემდეგ, რაც დავის საგნად ქცეული მთიანი ყარაბაღის ამჟამინდელი და ყოფილი ლიდერები მას პირადად ჩაუდგნენ თავდებში.
ქოჩარიანის სასამართლო მიმდინარე თვეში დაიწყო. მას ბრალად ედება კონსტიტუციური წყობის დამხობა მისი ათწლიანი მმართველობის ბოლო კვირებში, 2008 წლის აპრილში.
ერევნის სასამართლომ 18 მაისს გამოაცხადა, რომ 64 წლის ქოჩარიანი, რომელიც დეკემბრის შემდეგ იმყოფებოდა წინასწარ პატიმრობაში, გათავისუფლდება, რადგან მთიანი ყარაბაღის ლიდერები მას თავდებში ჩაუდგნენ და გარანტა გასცეს, რომ სასამართლოს განახლებისას ის სხდომაზე გამოცხადდება.
ქოჩარიანს ბრალი ედება უშიშროების ძალებისთვის უკანონო ბრძანების გაცემაში, რათა მათ ძალა გამოეყენებინათ ოპოზიციის მომხრეების მიმართ - რომლებიც აპროტესტებდნენ გაყალბების შესახებ ცნობებს 2008 წლის თებერვლის საპრეზიდენტო არჩევნებში. რვა დემონსტრანტი და ორი პოლიციელი შეეწირა 2008 წლის 1 მარტს დაწყებული საპროტესტო აქციების ჩახშობის პროცესს უშიშროების ძალების მხრიდან. ძალის გამოყენებამდე ქოჩარიანმა სამკვირიანი საგანგებო მდგომარეობა გამოაცხადა.
ქოჩარიანი ბრალდებებს უარყოფს და პოლიტიკურად მოტივირებულს უწოდებს.
1998-2008 წლებში სომხეთის პრეზიდენტის პოსტზე მსახურებამდე, ქოჩარიანი მთიანი ყარაბაღის ლიდერი იყო.