შს სამინისტრო: გორში ექსპერიმენტი ჩატარდა იაგო ნებიერიძის ჩვენების საფუძველზე
შს მინისტრის პირველი მოადგილის, კახაბერ საბანაძის განმარტებით, 8 წლის გოგონას მკვლელობისთვის ბრალდებულმა, იაგო ნებიერიძემ, ჩვენება მისცა 2004 წელს მომხდარ ამბავთან დაკავშირებითაც და შემდგომი საგამოძიებო პროცესები ამ ჩვენების საფუძველზე მიმდინარეობს. ლაპარაკია 11 წლის ბიჭის 14 წლის წინ გაუჩინარების ფაქტზე. საგამოძიებო მოქმედებები რამდენიმე დღის განმავლობაში მიმდინარეობდა გორის კულტურისა და დასვენების პარკში.
„2004 წლის საქმესთან დაკავშირებით გამოიკითხა ბრალდებული იაგო ნებიერიძე. მან მოგვცა დამატებითი ჩვენება. ჩვენების ფარგლებში ჩატარდა საგამოძიებო ექსპერიმენტი, დათვალიერებულ იქნა მითითებული ადგილი, ამოღებულ იქნა დოკუმენტური მასალა და ამჟამად მიმდინარეობს აღნიშნული მასალის შესწავლა“, - განუცხადა ჟურნალისტებს კახაბერ საბანაძემ.
2004 წლის 1 ნოემბერს, როდესაც 11 წლის ზაქრო ბერძენიშვილი გაუჩინარდა, იაგო ნებიერიძე ბერძენიშვილების ავტოფარეხის მშენებლობაზე მუშაობდა. ბავშვის გაუჩინარებასთან კავშირი მას მაშინ არ დაუდასტურდა და ნებიერიძემ სასჯელი ბერძენიშვილების ოჯახისთვის ფულის გამოძალვის ბრალდებით მოიხადა. ციხიდან გამოსვლის შემდეგ, იაგო ნებიერიძემ კიდევ ერთი ყაჩაღობა ჩაიდინა. მოგვიანებით ამნისტიითა და პრეზიდენტის შეწყალებით მას სასჯელის ვადა შეუმცირდა და ციხე 2018 წლის თებერვალში დატოვა. სამართალდამცავებმა ის 26 ოქტომბერს 8 წლის გოგონას მკვლელობის ბრალდებით დააკავეს. გამოძიება განზრახ მკვლელობისა და გარყვნილი ქმედების მუხლებით მიმდინარეობს.