ტრამპი: ხაშოგის მკვლელობაზე აშშ უახლოეს დღეებში გამოიტანს საბოლოო დასკვნას
აშშ-ის პრეზიდენტის, დონალდ ტრამპის თქმით, ვაშინგტონი მომავალი კვირის დასაწყისში გამოიტანს საბოლოო დასკვნას იმის შესახებ, თუ ვის ჰქონდა კავშირი ჯამალ ხაშოგის - ჟურნალისტის საუდის არაბეთიდან - მკვლელობასთან, მას შემდეგ, რაც გავრცელდა აშშ-ის დაზვერვის შეფასება, რომ მკვლელობა შეუკვეთა საუდის არაბეთის ტახტის მემკვიდრემ, მუჰამად ბინ სალმანმა. კალიფორნიაში მყოფმა ტრამპმა ჟურნალისტებს 17 ნოემბერს უთხრა, "სრული ანგარიში რამდენიმე დღეში გვექნება, ალბათ ორშაბათს ან სამშაბათსო". აშშ-ის სადაზვერვო სააგენტოები თვლიან, რომ ტახტის მემკვიდრემ შეუკვეთა დისიდენტის და ჟურნალისტის მკვლელობა, რომელიც თურქეთში, გასულ თვეში მოხდა. საუდის არაბეთმა უარყო ეს ცნობა, რომელიც პირველად ვაშინგტონ პოსტმა გაავრცელა 17 ნოემბერს, გვიან საღამოს და შემდეგ სხვა მედიასაშუალებებმაც დაადასტურეს, მათ შორის ასოშიეიტედ პრესმა და როიტერსმა. 17 ნოემბერს უფრო ადრე სახელმწიფო დეპარტამენტის პრესმდივანმა, ჰეზერ ნაუერტმა თქვა, ახლახან გავრცელებული ცნობები, თითქოს აშშ-ის მთავრობამ საბოლოო დასკვნა გამოიტანა ხაშოგის მკვლელობაზე, არ არის ზუსტიო.