Ադրբեջանը լկտիացել է նաև փաստից, որ Հայաստանից կրկին ՀԱՊԿ քարտուղար չընտրվեց. Գագիկ Համբարյան
Տավուշում հակառակորդի դիվերսիոն ներթափանցման փորձը Նոր տարու նախաշեմին սեփական ժողովրդին ինչ-որ բան ցույց տալու, ապացուցելու, ինչ-որ հոգեբանական բարդույթներ հաղթահարելու իլհամալիևյան ձեռագիրն է: Tert.am–ի հետ զրույցում, անդրադառնալով այսօր Չինարիի մերձակայքում ադրբեջանական դիվերսիոն փորձին` ասաց քաղաքագետ Գագիկ Համբարյանը:
«Երբ ինչ-որ ամսաթվերից առաջ, կամ իրադարձությունների կամ ինչ-որ պատվիրակությունների այցերից առաջ ինքն անպայման կազմակերպում է ինչ-որ սադրանքներ: Եվ նկատի ունենալով, որ առջևում Ամանորն ու Սուրբ ծնունդն է, մենք պետք է սպասեինք այն, ինչ Ադրբեջանն այսօր ձեռնարկեց: Ցավոք սրտի, ունեցանք մարդկային կորուստներ»,-ասաց քաղաքագետը:
Հիշեցնենք, որ դեկտեմբերի 29-ի վաղ առավոտյան ՀՀ Տավուշի մարզի՝ Չինարի գյուղից դեպի հարավ-արևելք ընկած պետական սահմանի հատվածում, ադրբեջանական զորքերը ձեռնարկել են դիվերսիոն ներթափանցման փորձ, որի հետևանքով մարտական գործողությունների ժամանակ հայկական կողմից կա երեք զոհ: ՀՀ պետական սահմանի պաշտպանության համար մղված մարտերի ընթացքում զոհվել են ավագ լեյտենանտ Շավարշ Մելիքսեթի Մելիքյանը, շարքայիններ Էդգար Գրիգորի Նարայանը և Էրիկ Գարիկի Աբովյանը: Ադրբեջանական կողմը, ըստ ՀՀ պաշտպանության նախարարության տվյալների, ունի առնվազն 7 զոհ, և հայկական դիրքերում թողել էր 1 դի:
Ի պատասխան հարցին, թե ինչու է Ադրբեջանը գնում նման քայլերի, քաղաքագետն առաջարկում է այդ «ինչու»–ն փնտրել մեր ու Մինսկի խմբի համանախագահների մեջ:
«Մեր մեջ պետք է փնտրենք, որովհետև մենք անընդհատ խաղաղասիրական հայտարարություններով են հանդես գալիս, գերադասում ենք, երբ դանակը ոսկորին է հասնում, նոր պատասխանել ադրբեջանական կողմին: Իսկ միջազգային հանրություն կոչվածն ի դեմս Մինսկի խմբի համանախագահների, որոնք մենաշնորհ ունեն արցախյան հարցի կարգավորման, անընդհատ անհասցե, անատամ, լղոզված հայտարարություններով են հանդես գալիս: Բացարձակ չեմ զարմանա, որ հիմա էլ էդ տիպի հայտարարությամբ հանդես գան»,- ասաց քաղաքագետը՝ նշելով, որ մեղավորությունը, այնուամենայնիվ, մերն է, որովհետև մենք ենք թույլ տվել, որ Ադրբեջանն այդքան լկտիանա:
«Եթե հայկական կողմերը կտրուկ, կոնկրետ պատասխան տան Ադրբեջանին, ապա Ադրբեջանը բավականին երկար ժամանակ սուս կմնա»,-նկատեց Համբարյանը:
Բացի այդ, քաղաքագետն այս սադրանքը պայմանավորում է նաև Սանկտ Պետերբուրգում ՀԱՊԿ գագաթնաժողովում Հայաստանին կրկին ՀԱՊԿ քարտուղարությունը չփոխանցելու փաստով:
«Այսինքն` Ադրբեջանը ի դեմս ՀԱՊԿ-ում իր դեսանտի` Բելառուսի, կարողացավ թույլ չտալ, որ Հայաստանի ներկայացուցիչը դառնա ՀԱՊԿ քարտուղար: Եվ սրանով նրանք հրճվանքի մեջ են և սա պատասխանն է Ադրբեջանի, որ դուք լինելով ՀԱՊԿ անդամ, միևնույն է, ոչ մի ՀԱՊԿ երկիր ձեր կողքին չի կանգնում»,- մեկնաբանեց Գագիկ Համբարյանը:
Հիշեցնենք, որ Սանկտ Պետերբուրգում Եվրասիական տնտեսական բարձրագույն խորհրդի նիստից հետո տեղի ունեցած ՀԱՊԿ Հավաքական անվտանգության խորհրդի նստաշրջանին հիմա էլ Բելառուսի նախագահի բացակայության և դրանով պայմանավորված քվորում չլինելու պատճառով ՀԱՊԿ գլխավոր քարտուղարի նշանակման հարցը հետաձգվեց մինչև հաջորդ տարվա ապրիլին կայանալիք կազմակերպության Հավաքական անվտանգության խորհրդի հաջորդ նստաշրջան:
Իսկ նախքան այդ էլ՝ աշնան սկզբին, Հայաստանը չստանձնեց ՀԱՊԿ նախագահությունը, քանի որ այն ժամանակ էլ Ղազախստանի նախագահ Նուրսուլթան Նազարբաևը հիվանդացավ չմասնակցեց ՀԱՊԿ՝ Երևանում կայացած հանդիպմանը՝ պատճառաբանելով, որ հիվանդ է։