Մոլդովայում ձերբակալել են Մոլդովայի հայ համայնքի ղեկավարի որդուն. մայրը բողոքում է, որ իրենց ներքաշել են քաղաքական խաղերի մեջ
Մոլդովայում հայ համայնքի ղեկավար Վեներա Գասպարյանի որդուն՝ Դավիթ Դավթյանին արդեն երկու ամիս է` Մոլդովայի ոստիկանությունը ձերբակալել է․ այս մասին Tert.am-ին հայտնեց Վեներա Գասպարյանը՝ նշելով, որ սկզբից նաև դստերը՝ Տաթևիկ Դավթյանին էին մի քանի օրով ձերբակալել:
«Մի քանի օրում երեխայիս գլխին քրեական գործ են հարուցել»,- ասաց նա՝ նկատի ունենալով որդու ձերբակալությունը: Ըստ նրա՝ իր ընտանիքին ներքաշել են քաղաքական ինտրիգների մեջ:
Վեներա Գասպարյանը նշեց, որ նույն օրը, երբ որդուն և աղջկան ձերբակալել են, հարձակում է եղել հայկական համայնքի՝ իր վերահսկողության տակ գտնվող եկեղեցու վրա, ջարդել են պատուհանների ապակիները, վնասել են գույքը: Նա պատմեց, որ իրենից պահանջում էին սեփականության մասին վկայականներ:
«Ասացի՝ ես գույք չունեմ, սա եկեղեցի է, մշակութային տուն է»,- նշեց նա:
Վեներա Գասպարյանը պատմեց, որ ընտանիքի հետ կատարվածը կապված է ռուս բանկիր Գերման Դորբունցովի դեմ կազմակերպված մահափորձի հետ: Նա նշեց, որ մահափորձի գործով իր նախկին փեսան՝ Վիտալի Պրոկն է ձերբակալված, ով նախատեսել էր հայտնել մահափորձի պատվիրատուի անունը:
Վիտալի Պրոկը, ըստ Վեներա Գասպարյանի, պետք է տար մոլդովացի քաղաքական գործիչ, բիզնեսմեն Վլադիմիր Պլախոտնյուկի անունը, որն էլ դա կանխելու համար դիմել է շանտաժի քաղաքականությանը:
«Երբ Վիտալին (նկատի ունի նախկին փեսային-Tert.am) ուղիղ եթերով պետք է հայտարարեր մահափորձի հեղինակի անունը, հարձակվեցին մեր ընտանիքի վրա, փակեցին բոլորին, ինքն էլ այնտեղ լռեց»,- պատմեց Վեներա Գասպարյանը:
Վեներան նշեց, որ իր նախկին փեսան իրենց ընտանիքի հետ կապ չի ունեցել, սակայն ահաբեկողները հաշվի են առել, որ Վիտալի Պրոկի երեխաներն իրենց հետ են ապրում: Դրա համար էլ պահանջել են, որ դիմեն իրենց նախկին փեսային, որ գրությամբ հանդես գա, թե Պլախոտնյուկին չի ճանաչում, նրա հետ կապ չունի:
«Նրա ընտանիքին էլ են ահաբեկել, քրոջը: Մեր ընտանիքն էլ դարձավ Պլախոտնյուկի քաղաքական խաղերի զոհը»,- ասաց Վեներա Գասպարյանը՝ հավելելով, որ Պլախոտնյուկը իր մարդկանցից մեկին է ուղարկել իր նախկին փեսայի մոտ՝ պահանջելով, որ այդպիսի գրությամբ թուղթ տա,սակայն նախկին փեսան մերժել է:
Վեներա Գասպարյանի խոսքով՝ որդու ձերբակալությունից հետո իրենցից են պահանջում, որ նախկին փեսայից հայտարարությունը վերցնեն. հավատացնում են, որ դրանից հետո իր որդուն ազատ կարձակեն:
«Տասը գործ են երեխուս վրա տասը օրում կպցրել: Բանտում հարձակվում են վրան, որ ինքը մեկի վրա ձեռք բարձրացնի, որ իր վրա մի բան էլ ավելացնեն»,- ասաց նա:
Վեներա Գասպարյանը նշեց, որ որդուն ազատելու համար ամեն ինչ անելու է, արդեն գրավել է մոլդովական լրատվամիջոցների ուշադրությունը: Նա հույս հայտնեց, որ Հայաստանի իշխանություններից էլ օգնություն կլինի: