Ավագանու նիստի բոյկոտը ուժի մեջ է. մենք չենք թողնի, որ Մամիկոնն իր աթոռը պահի մարդկանց դժբախտության հաշվին. Է. Մարուքյան
Վանաձորի ավագանու այսօր նշանակված նիստին ևս «Լուսավոր Հայաստանը» չի մասնակցի, քանի որ «համաձայն չեն, որ մարդկանց դժբախտության` հրդեհի հաշվին Մամիկոն Ասլանյանն աթոռը պահը»: Այս մասին Tert.am-ին հայտնեց ԼՀ կուսակցության նախագահ Էդմոն Մարուքյանը՝ պատասխանելով հարցին, թե այսօ՞ր էլ բացառություն չեն անի:
«Ավագանու նիստի գնանք ի՞նչ անենք: Իրենք ուզում են աջակցել մարդկանց՝ բյուջեից գումար տրամադրելով, մենք էլ ասում ենք՝ թող մարդկանց դժբախտության թիկունքում չթաքնվեն ու նման նախաձեռնություններով փորձեն աթոռ պահել: Այնպես որ, բոյկոտն ուժի մեջ է և սպասում ենք հրաժարականի դիմումի: Կամ էլ թող էնքան ձգեն, մինչև ավագանին կլուծարվի»,- ասաց Էդմոն Մարուքյանը:
Հիշեցնենք, որ այսօր նշանակված է Վանաձորի ավագանու նիստ, որի օրակարգում Վանաձորում օրերս հրդեհված ու կացարանից զրկված 5 ընտանիքներին աջակցություն ցուցաբերելու հարցն է:
Էդմոն Մարուքյանը հիշեցրեց, որ պատրաստ են բնակիչներին իրենց միջոցներից՝ ոչ քաղաքի բյուջեի, հենց այս չափով օգնություն տրամադրել:
Հիշեցնենք, որ երեկ «Լուսավոր Հայաստանը», «Հանրապետություն» կուսակցությունն ու «Քաղաքացիական պայմանագիրը» նախընտրական դաշինքով հանդես գալու ու մեկ կուսակցություն դառնալու մասին քաղաքական հուշագիր ստորագրեցին և առաջարկեցին մյուս ընդդիմադիրներին իրենց միանալ:
Հարցին, թե միանալու առաջարկներ ստացե՞լ են, Մարուքյանը պատասխանեց, որ դժվար էր ակնկալել մի քանի ժամվա մեջ նման առաջարկներ:
Ինչ վերաբերում է նրան, թե արդյոք ընդդիմադիրների շրջանում խանդ չի՞ առաջացրել իրենց միավորումը, որը նոր իրավիճակ է ստեղծել քաղաքական դաշտում, վերջինս նշեց. «Ես տեղյակ չեմ` ո՞վ ա խանդում, ո՞ւմ ա խանդում: Ու խանդը, առհասարակ, քաղաքական կատեգորիա չէ»: