Արմեն Վիրաբյանին, ում մեղսագրվում է Բաքվին հանձնվելու մտադրություն, ներքաշել են ինչ-որ կեղտոտ մանիպուլյացիաների մեջ. Դավիթ Սանասարյան
Տեղեկությունները, որ Արմեն Վիրաբյան անուն-ազգանունով քաղաքացիական ակտիվիստը ու Րաֆֆի Հովհաննիսյանի նախկին վստահված անձը պատրաստվում է հանձնվել Ադրբեջանին, իրականությանը չեն համապատասխանում, պարզապես Վահան Մարտիրոսյան անուն-ազգանունով դավաճանը նրան ներքաշել է ինչ-որ կեղտոտ մանիպուլյացիաների մեջ:
Այս մասին Tert.am-ին հայտնեց «Ժառանգություն» կուսակցության խոսնակ Դավիթ Սանասարյանը, ով այսօր խոսել է Գերմանիայում գտնվող Արմենի հետ:
«Նա, իհարկե, Գերմանիայում է , չի պատրաստվում գնալ Բաքու ու, ինչպես ես հասկացա, իրեն գցել են ինչ-որ մանիպուլյացիաների մեջ, որ ինչ-որ հայտարարության միանա խաղաղություն քարոզելու վերաբերյալ… մենք իր հետ խոսեցինք ու հասկացանք, թե ում հետ են ուզում խաղաղություն»,- ասաց Դավիթ Սանասարյանը:
Հիշեցնենք, որ Haqqin az-ը երեկ տեղեկացրել էր, թե Բաքու մեկնած Վահե Ավետյանին, Սյուզան Ջաղինյանին ու Վահան Մարտիրոսյանին կմիանա ևս մեկ հայ՝ Արմեն Վիրաբյանը:
Դավիթ Սանասարյանը Արմեն Վիրաբյանից պարզել է, որ նա այդ պատմության մեջ հայտնվել է Սյուզան Ջաղինյանի ու Վահան Մարտիրոսյանի հետ գրագրության մեջ հայտնվելու հետևանքով՝ կապված սահմաններին խաղաղության քարոզի հետ: Սակայն Դավիթն Արմենի ուշադրությունը հրավիրել է այն հանգամանքի վրա, որ այդ հայտարարության մեջ կա նաև խոսք տարածքների հանձնման մասին, ինչին ի պատասխան Արմենն ասել է, որ մաս չի կարող կազմել դավաճանության:
«Նա այս մասին վիդեոուղերձում, որը կլինի, հստակ կասի։ Նա ողջ գիշեր վիճաբանությունների է մեջ է եղել: Իմ համար մի բան է հստակ, որ վահանմարտիրոսյանները կոնկրետ աշխատանք են տանում, որ հնարավոր լինի, ինչ-որ մեկի թյուրըմբռնումը կամ կիսատ համաձայնությունը շրջանառության մեջ դնել, որ էս ինֆորմացիաները շրջանառվեն ու իրենք փող աշխատեն: Եվ ես վստահ եմ, որ ադրբեջանական կոնկրետ քարոզ ա Հայաստանում»,- ասաց Դավիթ Սանասարյանը:
Նա նշեց, որ Արմենի հետ կապ է հաստատել Վահան Մարտիրոսյանը, բայց չգիտի, թե որ երկրից:
Հիշեցնենք, որ վերջինիս Բաքուն արտահանձնել է ինչ-որ երրորդ երկրի:
Դավիթ Սանասարյանը տեղեկացրեց նաև, որ ապրիլյան պատերազմի ժամանակ, երբ կազմվում էր թարգմանիչների խումբ` Պաշտպանության նախարարության նյութերը տարբեր լեզուներով թարգմանելու համար, Արմեն Վիրաբյանն իրեն գիշեր-ցերեկ օգնել է` ֆիններեն ու անգլերեն թարգմանելով:
Նշենք, որ երեկ երեկոյան Tert.am զանգահարել նաև Արմենի եղբայրը` Արա Վիրաբյանը և մոտավորապես նույն բանը հայտնել: