ՀՀ-ն և ԵՄ-ն համագործակցում են ջրային ռեսուրսների արդյունավետ կառավարման ոլորտում
Եվրոպական միությունը պատրաստ է ջրային ռեսուրսների արդյունավետ կառավարման համար Հայաստանին դրամաշնորհ հատկացնել:
«ԵՄ ջրային նախաձեռնություն + քառամյա տարածաշրջանային» անվամբ ծրագրի շրջանակներում այսօր անցկացված քննարկման ժամանակ ՀՀ-ում ԵՄ պատվիրակության ղեկավար, դեսպան Պյոտր Սվիտալսկին, Եվրամիության համար ջրի կառավարումը կարևոր հարց է:
«Ջրային ռեսուրսների կառավարումը նախ քաղաքական կողմ ունի, ապա նաև տեխնիկական ներդրումների բաղադրիչ: Հայաստանի համար, կարծում եմ, երկու գործոնն էլ կարևոր է: Ծրագրի իրականացման շնորհիվ Հայաստանում կբարելավվի ջրամատակարարման ծառայությունների որակը»,- նշեց դեսպանը:
Սվիտալսկիի խոսքով՝ ծրագիրն անցկացվում է Արևելյան գործընկերության 6 երկրներում, որոնց համար սահմանված է 25 միլիոն եվրոյի դրամաշնորհ: ՀՀ բնապահպանության նախարար Արծվիկ Մինասյանի խոսքով՝ ընդհանուր գումարից դեռևս պարզ չէ, թե որքան բաժին կհասնի Հայաստանին:
«Ով առավել ակտիվ լինի, կստանա ավելի մեծ աջակցություն: Հայաստանն այս պահին բավական բարձր ակտիվություն է ցուցաբերում, այդ թվում՝ գործադրում է ջրավազանային պլան, որը հնարավորություն է տալիս մի կողմից բարելավվել ջրային կառավարման համակարգերը, մյուս կողմից՝ ապակենտրոնացման միջոցով, հնարավորություն ենք տալիս ջրի առաջարկի ու պահանջարկի սուբյեկտներին համատեղել իրենց ցանկությունները, ձևավորել առավել արդյունավետ համակարգ»,- մանրամասնեց Մինասյանը:
Նախարարը նշեց, որ միաժամանակ Հայաստանը նաև գետավազանային կառավարման համակարգն է զարգացնում՝ բնապահպանական լուրջ ծրագրեր անցկացնելու հետագա հեռանկարով: