Մխիթարյան. Միշտ երկրպագել եմ Անրիին, քանի որ ժամանակին նույնպես խաղում էի հարձակվողի դիրքում
Անգլիական «Մանչեսթեր Յունայթեդի» հայ կիսապաշտպան Հենրիխ Մխիթարյանն ակումբի մամուլի ծառայությանը տված հարցազրույցում խոսել է իր ֆուտբոլային կուռքի և Պրեմիեր լիգային հարմարվելու մասին:
«Միշտ երկրպագել եմ Թիերի Անրիին, երբ նա հանդես էր գալիս «Արսենալում»: Անրին իմ ամենասիրելի խաղացողներից էր, որովհետև փոքր տարիքում նույնպես հարձակվող էի, այնուհետև դարձա կիսապաշտպան:
Մեծ պատիվ է խաղալ «Մանչեսթեր Յունայթեդում», քանի որ դա նման է երազի: Միշտ ուրախ եմ լինել մեկնարկային կազմում, փորձում եմ անել լավագույնն այս թիմի համար:
Անգլիական ֆուտբոլը տարբերվում է այլ առաջնություններից: Եթե հանդես ես գալիս Անգլիայում, Ֆրանսիայում, Գերմանիայում կամ Իսպանիայում, պետք է սովորես այդ առաջնություններին: Սկզբից բարդ էր, սակայն ամեն ինչ արեցի Պրեմիեր լիգայի ֆուտբոլիստ դառնալու համար: Մեծ աշխատանք եմ կատարել և փորձել եմ անել այն ամենը, ինչ մարզիչը պահանջել է»,- ասել է Մխիթարյանը: