«1000 դրամ» նախագծի հիմնադրամը շահութահարկ չի վճարի. Վիգեն Սարգսյան
Կառավարության նախաձեռնությամբ հրավիրված ԱԺ արտահերթ նիստը մեկնարկեց «ՀՀ պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» նախագծի իրականացման համար համալրվող 9 օրենքների նախագծերի առաջին ընթերցմամբ: Նախագծերից հետո քննարկման կդրվի «1000 դրամ» անունը ստացած նախագիծն արդեն երկրորդ ընթերցմամբ:
Նախագծի հիմնական զեկուցող, ՀՀ պաշտպանության նախարար Վիգեն Սարգսյանը, ներկայացնելով նախագծերում կատարված փոփոխությունները, ասաց, որ սահմանվում է, որ հատուցման միջոցների վրա չի կարող տարածվել բռնագանձում, կիրառվել արգելանք կամ որևէ այլ սահմանափակում՝ որևէ պահանջով, բացառությամբ կյանքին կամ առողջությանը հասցված վնասներից:
«Առաջարկվում է ՀՀ պետական հարկի տեսակ ներառել նաև դրոշմանշային վճարը: Ստեղծված հիմնադրամը շահութահարկ չի տալիս, հատուցման հիմնադրամն ազատվում է օրենքով սահմանված բոլոր տեսակի պետական տուրքերի վճարումից: Սահմանվում է, որ հատուցման հիմնադրամի կողմից շահառուների անձնական տվյալների հրապարակումը չի համարվում օրենքով սահմանված հրապարակում»,-ասաց Սարգսյանը:
Պաշտպանության նախարարի խոսքով՝ նախագծի հաստատման արդյունքում զինծառայողների կյանքին կամ առողջությանը պատճառված վնասների հատուցման համակարգի շրջանակներում կապահովվի մի քանի օրենքների միասնականությունը: