«Թող Աստված օրհնի ՔՊ, ԼՀ և «Հանրապետություն» դաշինքը և Հայաստանը». եռյակի առաջնորդների ելույթներից
Թող աստված մեզ պահապան լինի, փրկենք Հայաստանը: Այս մասին «Լուսավոր Հայաստան», «Քաղաքացիական պայմանագիր» և «Հանրապետություն» կուսակցությունների միջև՝ 2017-ի ընտրություններին ընդառաջ քաղաքական հուշագրի ստորագրությունից հետո հայտարարեց ՔՊ-ն ներկայացնող Սասուն Միքայելյանը:
«Ուզում եմ դիմել մեր ժողովրդին, երկրի ապագայով մտահոգ բոլոր այն անձանց, ազատամարտիկներին, ովքեր կկարողանան սատարել մեզ, ինչն էլ կդառնա մեր հաղթանակի գրավականը»,-հայտարարեց Սասուն Միքայելյանը:
«Հանրապետություն» կուսակցության քաղխորհրդի նախագահ Արամ Սարգսյան էլ իր ելույթը սկսեց «բարի լույս»-ով:
«Սա մեր կուսակցության («Հանրապետություն») 15-ամյա գործունեության երրորդ դաշինքն է: Առաջինը «Արդարությունն » էր, որը հոկտեմբերի 27-ից հետո էր ձևավորված, դատապարտված էր կրկնօրինակել Կարեն Դեմիրճյանի ու Վազգեն Սարգսյանի «Միասնություն» դաշինքը: «Արդարությունը» որոշ հաջողություններ գրանցեց, բայց կարճ ժամանակ անց պարզ դարձավ, որ կրկնօրինակը չի կարող կրկնություն դառնալ: Երկրորդը «Հայ ազգային կոնգրես» դաշինքն էր, որում ունեինք ինչպես աշխարհաքաղաքական, այնպես էլ ներքաղաքական ու մարտավարական հարցերին վերաբերող տարաձայնություններ»,-արձանագրեց Արամ Սարգսյանը:
Ըստ նրա՝ այսօրվա դաշինքը տարբերվում է նախորդներից:
«Առաջին հերթին նրանով, որ եռյակը ձևավորվել է գաղափարական հենքի վրա՝ ի սկզբանե քննարկելով և ընդհանուր հայտարարի բերելով թե՛ աշխարհաքաղաքական, թե՛ մարտավարական ու ապագային միտված հարցերը»,-հավելեց Արամ Սարգսյանը՝ նշելով, որ ակնկալում են այնպիսի հանրային աջակցություն, որը հնարավորություն կտա իրականացնել 2008-ի «Մարտի 1»-ով կոփված հանրության երազանքները՝ «փակելով այդպես էլ 21-րդ դար չմտած գործող իշխանության ամոթալի էջը»:
Արամ Սարգսյանը նկատեց. «Մեր նպատակները բարի ու անկեղծ են, թող Աստված օրհնի մեզ»:
«Լուսավոր Հայաստանն» էլ ներկայացնող ԼՀ խորհրդի նախագահ Էդմոն Մարուքյանն էլ նկատեց, որ այս դաշինքը պահանջարկված էր ու գաղափարական ընդհանրություններ ունեցող երեք քաղաքական ուժերի համադրումը ի վիճակի է երկրում բեկում առաջացնելու:
«Մենք երբևէ չենք եղել ատելության ու անտագոնիզմի քարոզիչ: Հավատացել ու հավատում ենք ներառական գործընթացներին: Ու հնարավորինս շատ լուսավոր տեսլականներ ունեցող մարդկանց հրավիրում ենք միանալու»,-ասաց Էդմոն Մարուքյանը:
Նա նշեց, որ հաշվի առնելով Հայաստանի քաղաքական դաշտում տեղի ունեցող վերջին զարգացումները, որպես «անբասիր ընդդիմադիրներ»` բժշկի հոգատարությամբ պետք է պայքարեն տարածվող կեղծիքի ու ստի դեմ:
Էդմոն Մարուքյանը ևս իր ելույթը ավարտեց՝ ասելով. «Եվ թող Աստված պահպանի Հայաստանի Հանրապետությունն ու մեր բռնած ուղին»:
Նույն կուսակցության անդամ Մանե Թանդիլյանն էլ նկատեց, որ 3 քաղաքական ուժերի՝ միավորվել կարողանալու կարողությունը և այս օրը իրողություն դարձնելը հնարավոր եղավ միայն քաղաքական կամքի ու սեփական շահերը Հայաստանի Հանրապետության շահերից ցածր դասելու շնորհիվ:
Ասուլիսը հրավիրվեց ՀՀ օրհներգի հնչյուններից հետո:
Հիշեցնենք, որ «Լուսավոր Հայաստան», «Քաղաքացիական պայմանագիր» և «Հանրապետություն» կուսակցությունները քիչ առաջ ստորագրեցին հուշագիր, որի համաձայն՝ 3 քաղաքական ուժերը խորհրդարանական ընտրություններում հանդես են գալու միասնաբար, այսինքն` դաշինքով:
Այս ընթացքում երեք քաղաքական ուժերը բանակցելու են կուսակցություն ստեղծելու շուրջ: Իսկ իրենց դաշինքը համալրելու վերաբերյալ դիմումները երեք կուսակցությունները քննարկելու են համատեղ: