Իրանը 16.6 մլրդ դոլարի գործարք է կնքել Boeing-ի հետ
Իրանը հաստատել է, որ ավարտել է ամերիկյան Boeing ընկերության հետ 16.6 մլրդ դոլար արժողությամբ գործարքի կնքումը, որի շրջանակներում մտադիր է 80 ուղևորատար ինքնաթիռ գնել:
Այս մասին հաղորդում է Business Insider-ը` վկայակոչելով իրանական պետական լրատվամիջոցը, որը նշել է, որ գործարքը հնարավոր է դարձել իրագործել անցյալ տարի կնքված միջուկային համաձայնագրից հետո միայն:
Աղբյուրի հաղորդմամբ` Իրանը ցանկանում է ձեռք բերել 50 Boeing 737 և 30 Boeing 777 մակնիշի օդանավեր, որոնք կմատակարարվեն հաջորդ տասը տարում: Ինչպես նշվում է, սա ամերիկյան ընկերության հետ կնքված խոշորագույն գործարքն է 1979-ից ի վեր:
Հիշեցնենք, որ սեպտեմբերին Վաշինգտոնը Boeing-ին և ընկերության եվրոպական մրցակից Airbus-ին թույլտվություն էր շնորհել` «միլիարդանոց պայմանագրեր» կնքել Իրանի հետ: