Төркия сәүдә министры урынбасары: Без Россия базарына чыгу өчен Татарстанны сайлыйбыз
Төркия Татарстан белән товар әйләнешен һәм инвестицион хезмәттәшлекне үстерү белән кызыксына. Бу хакта илнең сәүдә министры урынбасары Мәхмүт Гюрджан бүген Конья шәһәрендә республика Раисе Рөстәм Миңнеханов белән очрашуда әйтте.
Гюрджан Татарстанның Россия белән Төркия арасында төбәкара хезмәттәшлекне үстерүгә керткән зур өлешен билгеләп үтте. «Төркия компанияләре Россия базарына чыгу өчен Татарстанны сайлый. Сез һәрвакыт безнең инвесторларга ярдәм иттегез һәм без сезгә моның өчен рәхмәт белдерәбез. Сезнең Төркиягә сәфәрегез безнең мөнәсәбәтләр үсешенә яңа этәргеч бирер дип өметләнәм», - диде министр урынбасары.
Моннан тыш, Мәхмүт Гюрджан Миңнехановның «Россия - ислам дөньясы» стратегик күзаллау төркеме башлыгы буларак эшчәнлеген югары бәяләде.
Татарстан Рәисе Төркия сәүдә министрлыгына Татарстан-Төркия хезмәттәшлегенә ярдәм иткәне өчен рәхмәт белдерде, республика Төркия партнерлары белән эшне дәвам итәчәк, дип билгеләп үтте.
«Бүген безнең товар әйләнеше 1,2 млрд доллардан артып китә, динамика бик уңай. Ләкин бу тынычланырга сәбәп түгел. Киресенчә, без Коньяга яңа партнерлар табу, аларны Россиягә чакыру, шуның белән безнең эшлекле элемтәләрне активлаштыру өчен килдек», - дип искәртте ул.