Фәрит Мөхәммәтшин: Таксида йөрү бәясенең артуы өчен нигез күрмим
Депутатлар парламентның 45нче утырышында Татарстанда такси эшен җайга сала торган закон проектын кабул итте. Бу таксида йөрү бәясе артуга сизелерлек йогынты ясарга тиеш түгел, дип белдерде ТР Дәүләт Советы Рәисе Фәрит Мөхәммәтшин.
«Закон проекты пассажирларның иминлегенә юнәлдерелгән. Юлларда синең белән янәшәдә пассажирлар утырган такси баруын белү өчен машинаның төсенә карата таләпләр билгеләү – ул куркынычсызлык. Таксидан файдаланучы кешеләрнең иминлеген тәэмин итү мөмкинлегеннән баш тарту өчен бәяләрне арттыруга нигез күрмим», - диде парламент башлыгы.
Мөхәммәтшин билгеләп үткәнчә, күп кенә төбәкләр, төбәк законнарында тиешле үзгәрешләр кабул итеп, такси ярдәмендә пассажирлар һәм багаж ташуны оештыру турындагы федераль законны хуплаган инде.
ТР транспорт һәм юл хуҗалыгы министры Фәрит Хәнифов искәрткәнчә, таксида йөрү бәясе арткан вакытлар да, аннары кимегән чаклар да һәрвакыт була. Әйтик, туристлар агымы арткан чорда һәм көчле салкыннар килгәч такси кыйммәтләнә.
Элегрәк Татарстанда 8 мең такси машинасы теркәлгән иде, бүген алар 3,5 меңгә калган. Хәнифов фикеренчә, закон проектын кабул итү пассажир йөртүчеләрне «соры базардан» чыгарачак һәм аларга үзмәшгуль булып теркәлергә мөмкинлек бирәчәк.
Пассажирлар һәм багаж ташуны контрольдә тоту өчен җаваплы башкарма хакимият органын ТР Министрлар Кабинеты билгеләячәк. Документны вәкаләтле орган бирәчәк.