Бөгелмәдән мобилизацияләнгән ир-ат яңа туган кызын видеоэлемтә аша күргән
Махсус хәрби операциягә Бөгелмәдән киткән хәрбинең хатынын бала тудыру йортыннан чыгардылар. 5 июльдә Владимир һәм Анастасиянең гаиләсендә кызлары Ульяна туган. Бу сабый ир белән хатынның икенче баласы. Хәзерге вакытта гаилә башлыгы алгы сафта, шуңа күрә ул яңа туган баласын видеоэлемтә аша күрә алды, дип хәбәр иттеләр «Татар-информ»га район матбугат хезмәтендә.
Бала тудыру йортыннан чыккан көнне әни белән балага тантаналы очрашу оештырдылар. Аларның хәлен белергә Бөгелмә һәм Бөгелмә районының хәрби комиссары Рафаэль Миңнетдинов, район башкарма комитеты җитәкчесенең социаль мәсьәләләр буенча урынбасары Ольга Плеханова, район үзәк хастаханәсенең баш табибы Александр Иванов, гаиләнең туганнары һәм якыннары килде. Алар гаиләне котлады, котлау хатлары, яңа туган балага бүләкләр һәм акчалата сертификат тапшырды.
«Әнисенә һәм кызчыкка чын күңелдән сәламәтлек, бөтен гаиләгә зур бәхет һәм иминлек телибез. Ватаныбыз чикләрен саклаучы хәрбиләребезнең барлык гаиләләренә дә кирәкле ярдәмнең вакытында һәм тулы күләмдә күрсәтелүе бик мөһим. Гаилә башлыгы тизрәк өенә кайтсын», – дип белдерде Ольга Плеханова.