Татарстанда сәнгать мәктәпләре сыйныф җитәкчеләренә өстәмә түләү кертергә тәкъдим ителә
Татарстанның сәнгать мәктәпләрендә гомуми белем бирү учреждениеләре һәм урта һөнәри белем бирү оешмалары үрнәгендә сыйныф җитәкчеләре өчен өстәмә түләүләр кертергә кирәк. ТР Дәүләт Советы депутаты Людмила Рыбакова Татарстан Дәүләт Советының мәгариф, мәдәният, фән һәм милли мәсьәләләр комитеты күчмә утырышында шундый инициатива белән чыкты.
«Безгә бу мәсьәләне җентекләп өйрәнү зарур. Мәктәпләр һәм урта һөнәри белем бирү учреждениеләрендә сыйныф җитәкчеләренә инде күптән түләүләр кертелде. Сәнгать мәктәпләрендә дә мондый педагоглар бар. Шундый ук сыйныф җитәкчелеген булдырырга кирәк, чөнки ул анда шулай ук белем бирү һәм тәрбия функциясе өчен җавап бирә», - дип белдерде депутат.
Ул Татарстан Дәүләт Советы көче белән әлеге мәсьәлә буенча Хөкүмәткә мөрәҗәгать әзерләргә тәкъдим итте.
Искәртеп узабыз, бүген Татарстан Дәүләт Советының мәгариф, мәдәният, фән һәм милли мәсьәләләр комитеты күчмә утырышында сәнгать мәктәпләрендә белем бирү мәсьәләләре хакында фикер алыштылар. «Татар-информ» агентлыгы элегрәк бу хакта хәбәр иткән иде.