Татарстан торак төзелеше буенча еллык планны 45 процентка үтәде
Татарстанда 1,4 млн квадрат метр торак файдалануга тапшырылган, республикада торак төзелеше буенча еллык план 45 процентка үтәлгән, дип хәбәр итте Татарстан Республикасы төзелеш, архитектура һәм торак-коммуналь хуҗалык министрлыгы башлыгы Марат Айзатуллин.
Торакны файдалануга тапшыру темплары буенча лидер булып коммерция секторы тора – еллык планның 46 процентын алар башкарды, диде ул ТР Министрлар Кабинетында узган киңәшмәдә. Киңәшмәне республика Рәисе Рөстәм Миңнеханов уздырды.
Төзүчеләр 660 мең квадрат метр мәйданлы күп фатирлы 91 йортны тапшырдылар, дип хәбәр итте министр. Аның әйтүенчә, социаль ипотека программасы 42 процентка үтәлгән, шул нигездә республикада 17 йорт төзелгән.
«Шәхси торак төзелеше буенча статистик хисап еллык планның 45 процентка үтәлүен күрсәтә – бу 674 мең квадрат метр», – дип өстәде Айзатуллин.
Ул шулай ук Татарстанда төзелә торган объектларны тикшерү дәвам итүен әйтте. Мәсәлән, үз-үзен көйләүче оешмалар көче белән ел башыннан 772 тикшерү үткәрелгән, 335 контроль-күзәтчелек чарасын Дәүләт төзелеш күзәтчелеге үткәргән. Татарстан Республикасының Баш инвестицион-төзелеш идарәсе төзелешләрдә 210 тапкыр контроль-күзәтчелек чарасы уздырган. Министр әйтүенчә, быел гыйнвардан башлап ачыкланган 314 хокук бозу очрагы инде бетерелгән.