Түбән Камада 2 меңнән артык Үзбәкстан гражданы тавыш бирәчәк
Түбән Камада Үзбәкстан гражданнарына Конституциягә төзәтмәләр кертү буенча вакытыннан алда тавыш бирү өчен өч сайлау участогы оештырылды.
Үзбәкстан Республикасы Конституциягә төзәтмәләр буенча референдум үткәрүгә әзерләнә, ул 30 апрельдә узачак. Туган иленнән читтә булган республика гражданнары бу референдумда катнаша ала. Бу хакта Түбән Кама муниципаль районы рәсми сайтында хәбәр ителә.
Тавыш бирү участоклары Түбән Камада да ачылды. Үзбәкстанның дистәләгән гражданы Халыклар дуслыгы йортына килде. Шулай ук республика гражданнарына уңайлы булсын өчен, сайлау участогы төзүчеләрнең вахта шәһәрчеге территориясендә оештырылды.
Үзбәкстан Конституциясенә үзгәрешләр кертү буенча Референдум - ил гражданнары өчен мөһим вакыйга. Уңай үзгәрешләр тормышның социаль аспектларына кагылачак. Алар арасында мәгариф, медицина, эшкә урнашу, аз керемле гаиләләргә ярдәм итү һәм башкалар бар.
«Референдум бездә Үзбәкстан Республикасы Конституциясе һәм референдум турында закон нигезендә үткәрелә. Бүген һәр гражданның дәүләт һәм җәмгыять белән идарә итү хокукы бар, бу үзгәрешләр һәр кешенең тормышында булачак», - диде Үзбәкстан Республикасының Казандагы генераль консуллыгының беренче секретаре Камол Давронов.
Түбән Камада вакытыннан алда тавыш бирү ике көн барачак, бүген тәмамлана. Шәһәрдә 2330 Үзбәкстан гражданы бар һәм алар сайлауда катнаша ала.