Төмән өлкәсенең Талымхан авылында ике музей эшли

«Яңарыш» газетасында Төмән районы Талымхан авылыннан Рәйсә Рәхимованың «Талымхан авылы музейлары» дигән язмасы чыкты.

Авылыбызда музейлар икәү, берсе – 20 ел эшләүче мәктәп музее, икенчесе – яңа булдырылган йорт, өй музее. Мәктәп музеен башлангыч класслар укытучысы Тәслимә Мөхәмәдзянова җитәкли, ә мини-музей Шамил абый Юскаевның оныгы – 8 нче сыйныф укучысы Илдар Юскаев тырышлыгы белән нигезләнгән.

Хәзерге көндә лаеклы ялда булган Самад Мәхмүтов иске агач мәктәп бинасында беренче эш экспонатларын җыйган, ә яңа таш мәктәп салынгач, 2003 елдан 2013 елгача мин укучылар ярдәмендә яңа зур бүлмәдә музей бизәдем.

Мәктәп музее 2013 елдан статуслы, ә Илдарның өй музее бер бүлмә почмагында гына әле. Төмән районы ветераннар советы 2022 елда СССРның 100 еллыгына багышлап иҗади конкурс игълан иткән. Шул конкурста катнашканы өчен аңа Мактау хаты бирелде.

Мәктәп музее өч экспозициядән тора. Музей экскурсоводлары төрле конкурсларда катнашалар, семинарларда, кичәләрдә чыгыш ясыйлар. Мәктәптә үткән татар теле һәм әдәбияты укытучылары семинарында катнашкан апаларга музейга экскурсия оештырдылар. 8 нче класс укучылары Олеся Ильясова белән Мәдинә Абдразакова «Үлемсез полк», «Безнең чор батырлары» дигән стендларны яктырттылар. Олеся Бөек Ватан сугышына багышланган почмакта халкыбызның үлемсез батырлыгын, төрле авырлыкларны җиңеп чыгарга ярдәм иткән, яшәү теләген яктырткан материаллар турында сөйләде.

Музей яшь буынга авыл тарихын белү, халкыбызның гореф-гадәтләрен саклау, күренекле кешеләр турында материаллар туплау максатлары белән эшли.