Лукашенко – Миңнехановка: Беларусь Ту-214 самолеты өчен компонентлар җитештерергә әзер
Беларусь Россия самолетлары өчен компонентлар җитештерүне җайга салырга әзер, дип белдерде Беларусь Республикасы Президенты Александр Лукашенко ТР Рәисе Рөстәм Миңнеханов белән очрашуда.
Лукашенко Казан авиация заводының Ту-214 пассажир самолетын күпләп җитештерә башлавын искәртте. Аның сүзләренчә, Беларусь Республикасында тиешле компетенцияләр һәм җитештерү куәтләрен саклап калганнар, шуңа күрә Беларусь җитештерүчеләре алар өчен кайбер компонентлар эшләп чыгаруны җайга салырга әзер. Бу хакта БелТА агентлыгы хәбәр итә.
Беларусь лидеры Лукашенко Миңнеханов белән очрашуда импортны алыштыру мәсьәләсендә тизлекне арттырырга чакырды. «Беларусь һәм Россиянең транспорт машина төзелеше өчен автокомпонентлар базарына гына да ел саен 19 миллиард доллардан артык тиешле продукция чыгарыла. Бу – бик зур акча, без аны беркемгә дә бирергә тиеш түгел», - диде Лукашенко.
Ул билгеләп үткәнчә, Союздаш ил кысаларында Беларусь машина төзелешендә унбишкә якын проектны гамәлгә ашыра башларга ниятли. «Финанс мәсьәләләре хәл ителде», - дип искәртте Лукашенко.
Искәртеп узабыз, Миңнеханов кичә рәсми визит белән Минскига килде. Бүген ул шулай ук Россиянең Беларусь Республикасындагы гадәттән тыш һәм тулы вәкаләтле илчесе Борис Грызлов белән сәүдәне үстерү перспективалары хакында фикер алышты һәм Җиңү монументына венок куйды.
Кичә Минскидагы 407нче гражданнар авиациясе заводының Ту-214 самолетлары өчен компонентлар җитештерә башлаячагы хакында хәбәр ителгән иде.