Алсу Гайнуллинага «Тантана» премиясе тапшырылды
«Тантана» театр премиясе белән «Икенче пландагы иң яхшы хатын-кыз роле» номинациясендә Камал театры артисты, Россиянең һәм Татарстанның халык артисты Алсу Гайнуллина бүләкләнде.
«Тантана» премиясе актрисага Камал театрында куелган «Болганчык еллар. Мөһаҗирләр» спектаклендә Зөһрә әби роле өчен тапшырылды.
Алсу Гайнуллинага лауреат дипломын Бөтендөнья татар конгрессы башкарма комитеты рәисе Данис Шакиров тапшырды.
«Театр ул милләтнең көзгесе. Театр халык белән янәшә яши, бигрәк тә милли театр», - диде Данис Шакиров.
«Артист өчен иң зур бүләк - ул роль. Ə ролеңнең бәяләнүе бик күңелле», – диде Алсу Гайнуллина сәхнәгә чыгып. Ул кыскача гына «Тантана» премиясенең барлыкка килү тарихын искә төшерде. Зал Алсу Гайнуллинаны басып алкышлады
- «Тантана» премиясе лауреатларын бүләкләү тантанасы Әлмәт татар дәүләт драма театры залында бара. «Татар-информ» тантананы онлайн күрсәтә.