Икътисади үсеш министрлыгы: Бюджетта туристлык кешбэгының яңа этабына акча салынмаган
Хәзерге вазгыятьтә туристлык кешбэгы программасын озайту урынлы түгел. Бу хакта бүген Икътисади үсеш министрлыгында туристлык эшчәнлеге өлкәсендә проектларны гамәлгә ашыру департаменты директоры вазифасын вакытлыча башкаручы Дмитрий Веригин әйтте.
Аның сүзләренчә, алдагы елларда программа актуаль булган, әмма хәзер өлкәдә урнашу урыннарына артык ихтыяҗ туган. Шул рәвешле, эчке туризм өчен инфраструктура булдыруга карамастан, базар тәкъдим дефицитын кичерә.
«Акча баштан ук салынмаган иде. <...> Шуңа күрә туризм буенча илкүләм проектта без кулланучылар ихтыяҗын канәгатьләндерү бурычын куйдык: модульле төзелеш һәм башка проектларны эшләтеп җибәрдек», - диде ул. Бу хакта «Интерфакс» яза.
Акча әле бүлеп бирелергә мөмкин, әмма программа элеккечә эшләмәячәк, - диде Дәүләт Думасында Севастопольдән депутат, туризм һәм туристлык инфраструктурасын үстерү комитеты рәисе урынбасары Татьяна Лобач.
«Самолетлар очмый торган төбәкләр катлаулы хәлдә. Минемчә, кешбэк - туриндустриягә ярдәм итү өчен кайбер төбәкләрдә кулланырга мөмкин булган ярдәм чараларының берсе», - дип саный ул.
Туристлык кешбэгы программасы эчке туризмны үстерү өчен эшләнгән иде. Россия чикләрендә ял итү өчен «Мир» картасы белән түләүченең 20 мең сумга кадәр компенсация алу мөмкинлеге бар иде.
Россия Президенты Владимир Путин инициативасы белән Ерак Көнчыгышка сәфәр өчен югары кешбэк каралган. Ә аннары 2022 елның мартыннан программа балаларның җәйге ялына да таралды.