Татарстанда дүрт бала белән мунчада яшәүче гаиләнең йортына газ кертергә җыеналар
Менделеевск районында берничә ел мунчада яшәүче күп балалы гаиләнең йортына газны чиратсыз кертергә һәм ремонт ясарга ярдәм итәргә җыеналар. Бу хакта «Татар-информ»га Менделеевск районы матбугат хезмәтендә хәбәр иттеләр.
Менделеевск районында күп балалы Курихиннар гаиләсендәге вазгыятьне район башкарма комитеты җитәкчесе урынбасары Константин Макаров шәхси контроленә алды. Гаиләнең балалар теркәлгән йортта түгел, ә мунча белән берләштерелгән җәйге йортта яшәве ачыкланганнан соң, вазгыятькә җирле хакимиятнең катнашуы таләп ителде. Моңа шулай ук опека органнары да игътибар итте. Район делегациясе гаилә яшәгән урында булды.
Оксана Курихинаның биш баласы бар (олы бала Минзәләгә укырга киткән, шуңа күрә алар белән яшәми). Ул ана капиталы акчасына Менделеевск районының Турай авылында йорт сатып алган. Гаилә анда яшәми, мунчада яши. Сәбәпләрен белү һәм нинди ярдәм чаралары кирәклеген ачыклау өчен, район башлыгы кушуы буенча анда Константин Макаров булды.
«Без кирәкле бөтен ярдәмне күрсәтәчәкбез. Шулай итеп, Курихиннар гаиләсенең йортын газга чиратсыз тоташтырырга карар кылдылар. Җәй көне Оксана Турайда үз өендә яшәгән, ләкин аннары балалары белән ире янына киткән. Анда балалар белән яшәү өчен шартлар юк. Без, әлбәттә, балаларны өйләренә алып кайтуны таләп итәчәкбез. Ремонт белән дә ярдәм итәрбез», - дип сөйләде түрә.
Күп балалы гаилә район хакимияте игътибарында тора. Узган ел Курихиннар республика бюджетыннан 840 мең сум, шулай ук муниципаль бюджеттан 330 мең сум - барлыгы 1 млн 170 мең сум субсидия алган. Аларга Башкарма комитет һәм Татарстан Авыл хуҗалыгы һәм азык-төлек министрлыгы ярдәм иткән.
«Курихиннар үз хуҗалыгын ачарга теләде. Без аларны хупладык. Аларның ферма ачты, сөт тапшыралар. Гаиләнең яшәү шартлары мәсьәләсен хәл итәсе калды», - дип уртаклашты Константин Макаров.
Газны тоташтырып, йортны ремонтлаганнан соң, Курихиннар гаиләсе Турай авылында үз йортына күчәчәк дип көтелә. Вазгыять район хакимияте һәм опека органнары контролендә тора. Якын арада комиссия йортны тикшерә һәм эш күләмен ачыклый. Администрация мәсьәләне бергә хәл итү инициативасы белән район депутатларына мөрәҗәгать итәргә җыена.