Аферистлар Чаллыда яшәүче хатын-кызны һәм аның ике кызын фатирсыз калдырган

Полициягә Чаллыда яшәүче 55 яшьлек хатын-кыз мөрәҗәгать иткән. Ул үзенең аферистлар корбаны булуын сөйләгән, дип хәбәр иттеләр Татарстан Республикасы буенча Эчке эшләр министрлыгының матбугат хезмәтендә.

Аның сөйләвенчә, хатын-кызга үзен банк хезмәткәре дип таныштырган ир-ат шалтыраткан. Ир-ат аның исеменә билгесез затларның кредитлар рәсмиләштерүен һәм хәзерге вакытта акчаларны алырга тырышулары турында ышандырган. Кредитны бетерү өчен хатын-кызга башка кредит алырга һәм аны «сакланган счетка» салып куярга кирәк була. Хатын-кыз ул кушканнарны эшли – өч банктан барлыгы 600 мең сум акча рәсмиләштерә.

Зыян күрүче шалтыратучыларның бик ышандырырлык итеп сөйләшүләре турында әйтә – алар хатын-кызның ике кызын да алдый алган. Ялган банк хезмәткәрләре белән элемтәдә булу өчен 32 яшьлек кызлар фатирларын һәм машиналарын залог итеп кредитлар рәсмиләштергән. Чаллы кызлары акчаларны банклардан да, микрофинанс учреждениеләреннән дә алган.

Аферистлар үз корбаннарын даими контрольдә тоткан. Алар хәтта фатирларын сатуны да оештырган, барлык килешүләрнең чын булмавын, ә акчаларның һәм милекнең кире кайтачагын ышандырган. Нәтиҗәдә, гаилә тораксыз калган һәм дачада яши башлаган. СНТ буенча күршеләре гаиләгә аферистлар корбаннары булулары турында аңлаткан.

Полиция хәзерге вакытта мошенниклар турында мәгълүматларны һәм аларның кайда булуларын ачыклый. Аларның Мәскәүдә, Ленинград өлкәсендә һәм Татарстанда теркәлгән телефон номерларыннан шалтыратулары билгеле.