Новости за 01.10.2023

Татарстан Хөкүмәте «Дәүләт милли сәясәтен гамәлгә ашыру» программасының яңартылган версиясен раслады. Яңа редакциядә программадан «гомумроссия гражданлык һәм Татарстан тәңгәллеген ныгыту» турындагы пункт өлешен һәм «Татарстан тәңгәллеге дәрәҗәсе» күрсәткечен төшереп калдырганнар. Документны ТР Премьер-министры Алексей Песошин имзалаган.

Татарстан Хөкүмәтенең 2023 елның дүртенче кварталына эш планы расланды. Республика Премьер-министры Алексей Песошин шул хактагы боерыкны имзалады.

Татарстан Премьер-министры Алексей Песошин республика халкын Өлкәннәр көне белән тәбрик итте.

Түбән Кама муниципаль районы башлыгы Рамил Муллин ата-аналарга мәктәпкә килеп, балаларга бирелә торган азыкның сыйфатын тикшерергә тәкъдим итте. Бу хакта Түбән Кама муниципаль районы рәсми сайтында хәбәр ителә.

Чистай районы Актау авылында халыкка комплекслы хезмәт күрсәтү пункты барлыкка килде. Яңа сәүдә объекты «Авыл кибете» максатчан республика программасы буенча төзелде. Бу хакта «Чистай-информ» хәбәр итә.

Яшел Үзән үзәк район хастаханәсенең терапия корпусында намаз бүлмәсе җиһазландырылган. Ул кардиологиядә дүртенче катта урнашкан, намаз уку өчен бирегә алты катлы бинаның барлык бүлекчәләреннән дә килергә мөмкин. Бу хакта «Яшел Үзән» сайтында хәбәр ителә.