ایران د امریکا له استخباراتو سره اړیکې په تور ۸ کسان نیولي
راپور وايي چې دا کسان یې هغه مهال نیول شوي چې د ایران د حکومت پر ضد پراخ لاریونونه پیل شول.
ایرنا دولتي خبري اژانس خبر ورکړی چې یو شمېر کسان چې غوښتل يې د لاریونو معلومات ټول کړي او له هېواده یې دباندي ولیږي، وپيژندل شول او توقیف شول.
ایرنا د چهارشنبې په ورځ وویل چې شپږ کسان په لاریونو کې د ګډون پر مهال نیول شوي او دوه نور یې په داسی حال کې نیول شوي چې د لاریونو معلومات یې بهر ته لېږل.
دې خبري اژانس ویلي چې نیول شوي ټول کسان په بېلابېلو هېوادونو کې روزل شوي چې څه ډول ولسي خبریالان شي.
دا راپور په داسې حال کې خپور شوی چې د ایران مشر ایت الله علي خامنه یي وویل، امريکا په ایران کې خطرناکه دسیسه پر مخ وړي.
د بشري حقونو مدافع ډلې وايي، تېره اوونۍ د لاریونو پر مهال د ایران په سلو ښارو کې ۱۴۰ کسان ووژل شول او اووه زره نور يې زندانیان شوي دي.
د امريکا د بهرنیو چارو وزیر مایک پامپیو د سې شنبې په ورځ وویل چې شا او خوا شل زره ويډیوګانې، پیغامونه او عکسونه یې له ایرانیانو ترلاسه کړي چې له بشري حقونو سرغړونه ښکاروي.