نورستانۍ: ډېر ژر به د ولسمشرۍ ټاکنو لومړنۍ پایلې اعلان کړو
میرمن نورستانۍ پرون (سه شنبه) ازادي راډیو ته وویل، په کندهار او ننګرهار ولایتونو کې د رایو د بیا شمیرنې او څېړنې له بشپړېدو وروسته به د لومړنیو نتایجو د اعلان په اړه پریکړه وکړي.
د نوموړې په وینا په دې دوو ولایتونو کې د رایو د بیا شمیرنې او تفتیش بهیر نن ( چارشنبه) بشپړیږي.
نورستانۍ زیاته کړه: "په مجموع کې پرېکړه داده چې د خلکو انتظار پای ته ورسول شي او لومړنۍ پایلې به ډیر ژر اعلان کړو، ځکه ستونزې باید ټولې شي، له هغې وروسته که دوستان شکایت لري کولی شي د شکایتونو کمېسیون کې یې ثبت کړي."
د میرمن نورستانۍ په وینا په اوو ولایتونو کې د رایو د بیا شمیرنې او څېړنې د بهیر پر وړاندې ستونزه لا هم پر خپل ځای ده.
ټاکل شوې وه چې د ولسمشرۍ د ټاکنو لومړنۍ پایلې د میزان په اوه ویشتمه اعلان شوي وای خو تر اوسه څو ځل د دې پایلو اعلان ځنډول شوی دی.