Збігнеў Клышка: «Я восем гадоў вырошчваў на градах чорную кукурузу, пакуль яна дала насенне»

Днямі ў рэдакцыю «ГС» завітаў аграном-пенсіянер з вёскі Сасноўка, што на Слонімшчыне, Збігнеў Клышка, які распавёў пра сваё нехарактэрнае для Беларусі захапленне — вырошчванне чорнай кукурузы.

Сообщение Збігнеў Клышка: «Я восем гадоў вырошчваў на градах чорную кукурузу, пакуль яна дала насенне» появились сначала на Газета Слонімская.

— Пра гэтую культуру і яе карысныя для чалавека ўласцівасці я даведаўся досыць даўно са спецыяльнай літаратуры. Беларусам чорная кукуруза амаль невядомая, бо паходзіць з далёкай Перу, — пачаў свой аповед Збігнеў Сяргеевіч. — Але пры цяперашнім надвор`і яна можа расці і ў нас. І тады на вашай градцы будзе самы сапраўдны лекар. Бо зярняты чорнай кукурузы вельмі багатыя мінеральнымі рэчывамі, мікраэлементамі, незаменнымі амінакіслотамі, бялком і вітамінамі. Вучоныя выявілі, што чорная кукуруза вельмі добра ўздзейнічае на работу сардэчнай мышцы чалавека, дапамагае ачышчаць арганізм, выводзіць з яго шлакі, радыенукліды, таксіны і халестэрын. На аснове гэтай культуры выпускаюць прэпараты, якія папярэджваюць старэнне арганізма, дапамагаюць змагацца з ракам, бяссонніцай, атлусценнем, алергіяй, парушэннем абмену рэчываў, цукровым дыябетам і яшчэ шмат якімі іншымі хваробамі. З кіяхоў васковай спеласці гэтай кукурузы можна рабіць адвары, якія дапамагаюць пры захворваннях падстраўнікавай залозы, нервовай сістэмы, пры тым жа парушэнні абмену рэчываў і цукровым дыябеце. І я на сабе ўжо пераканаўся, наколькі карысная для чалавека гэта культура. А я, як бачыце, чалавек ужо не малады.

— Вы кажаце, што пра ўсе гэтыя карысныя якасці чорнай кукурузы даведаліся з навуковай літаратуры, а як да Вас патрапіла яе насенне?

— Я калісьці выпісваў расійскі часопіс «Грыбная аптэка». Адтуль даведаўся, што насенне чорнай кукурузы можна набыць у Маскве. Спецыяльна паехаў у Маскву і купіў там насенне. Было гэта, здаецца, у 2009 ці ў 2010 годзе.

— І што было пасля?

— Я пасадзіў кукурузу на асобнай градцы, чакаў, пакуль узыдзе, потым даглядаў яе, сачыў за ростам і развіццём. Але ні ў першы, ні ў другі, ні ў трэці год чорная кукуруза на маім полі не давала рады паспяваць. Культура гэта ўсё ж вельмі цеплалюбівая. Я восем год вырошчваў на градах чорную кукурузу, пакуль яна дала насенне. Апошнія два гады яна ў мяне паспявае, і я яе высаджваю вясной ужо са свайго насення.

— І калі Вы яе садзіце-сееце?

— Таксама як і нашу белую, чорную кукурузу найлепей са­дзіць у красавіку. Толькі чорную кукурузу не трэба садзіць блізка з белай, бо яны пераапыляцца. Насенне чорнай кукурузы, перад тым як пасадзіць у зямлю, я прарошчваю ў вадзе, і тады яна лепш узыходзіць і хутчэй расце, — зазначыў Збігнеў Сяргеевіч.
Сасноўскі аграном падараваў аўтару гэтых радкоў некалькі спелых кіяхоў сваёй чорнай кукурузы на насенне. Вясной пасадзім ды паглядзім, што з яго вырасце.

Фота аўтара і з архіва Збігнева Клышкі

Сообщение Збігнеў Клышка: «Я восем гадоў вырошчваў на градах чорную кукурузу, пакуль яна дала насенне» появились сначала на Газета Слонімская.