Андрей Каргинов экипажы «Дакар» раллиенда рәттән өченче этапта җиңде
(Казан, 13 гыйнвар, «Татар-информ»). Андрей Каргинов җитәкчелегендәге «КАМАЗ-Мастер» командасы экипажы йөк автомобильләре категориясендә «Дакар» ралли-рейдының сигезенче этабында беренче булды. Андрей Каргинов участокны 4 сәгать 24 минут 58 секундта узды, бу ралли-рейд этапларында рәттән өченче җиңү.
Бүген Согуд Гарәбстанында «Дакар-2020» халыкара ралли-марафонының сигезенче этабы Вади-Әл-Давасир — Вади-Әл-Давасир маршруты буенча узды. Бу хакта «КАМАЗ-Мастер» командасы матбугат хезмәте хәбәр итте.
Махсус участокның озынлыгы 474 км тәшкил итте. Икенче урында -«КАМАЗ — Мастер» командасыннан Антон Шибалов, өченчедә-Чехиядән Алеша Лопрайс җитәкчелегендәге «Татры» экипажы. Дмитрий Сотников экипажы («КАМАЗ-Мастер») дүртенче урынны алды.
Узыштан төшеп калган Эдуард Николаев «Дакар»да чыгышын дәвам итә, Dakar Experience аерым зачетында 46 км үтеп, бишенче урынны алды.
Ралли-марафон 17 гыйнварда тәмамлана.