ABŞ NATO ýaranlaryna esger iberýär, Baýden 5-nji maddany ‘mukaddes borç’ atlandyrýar
Pentagon şu hepdäniň dowamynda Polşa, Rumyniýa we Germaniýa özüniň 3 müň harbysyny ýollajakdygyny mälim etdi. ABŞ-nyň prezidenti Jo Baýden bu kararyň rus prezidenti Wladimir Putin bilen gepleşiginde oňa aýdan sözleri esasynda amal edilýändigini, şeýle-de munuň NATO-nyň 5-nji maddasyna laýyklykdaky “mukaddes borjy” äşgär edýändigini belledi.
“[Putin] dyzmaçlyk hereketlerini dowam etdirdigiçe, biz hem NATO ýaranlarymyzy we Gündogar Ýewropany özümiziň ol ýerde boljakdygymyzy, şeýle-de 5-nji maddanyň mukaddes borçdugyny kepillendireris” diýip, Baýden 2-nji fewralda CNN-iň habarçysyna aýtdy.
NATO-nyň esaslandyryjy ylalaşygynyň 5-nji maddasyna laýyklykda, eger-de oňa agza bir döwletiň özygtyýarlylygyna we territorial bitewiligine howp abansa, onda ýaranlygyň ähli agzalary şol döwlete hemaýata gelmäge borçludyrlar.
Pentagonyň metbugat wekiliniň sözlerine görä, Birleşen Ştatlaryň 2 müňe golaý harby gullukçysy Polşa we Germaniýa ýerleşdiriler, şol bir wagtda Germaniýadaky 1 müň esger Rumyniýa iberiler.
Moskwa ABŞ-nyň bu hereketini ýazgaryp, munuň “harby dartgynlylygy artdyrjak, şeýle-de syýasy çözgütleriň gerimini azaltjak ýaramaz ädim bolandygyny” aýtdy.